લખનૌ: ઉત્તર પ્રદેશની રાજધાની લખનૌના જાનકીપુરમ વિસ્તારમાં હૃદયદ્રાવક કિસ્સો સામે આવ્યો છે. એક હિન્દુ યુવતીને પ્રેમની જાળમાં ફસાવી, દિલ્હી લઈ જઈ તેના પર ધર્મ પરિવર્તન કરવા અને નિકાહ કરવા માટે અમાનુષી અત્યાચાર ગુજારવામાં આવ્યો હોવાનો આરોપ લાગ્યો છે. આરોપીએ યુવતીના અશ્લીલ વીડિયો બનાવી તેને વાયરલ કરવાની ધમકી આપીને બાનમાં રાખી હોવાનું બહાર આવ્યું છે.
પ્રેમના નામે દગો અને અત્યાચાર
પીડિતાના ભાઈએ કરેલા ગંભીર આક્ષેપો મુજબ, તે જ વિસ્તારમાં રહેતા નફીસ ખાને તેની બહેનને પ્રેમ સંબંધમાં ફસાવી હતી. ગત મહિને નફીસ યુવતીને લલચાવી ફોસલાવીને દિલ્હી લઈ ગયો હતો. દિલ્હી પહોંચ્યા બાદ નફીસનો અસલી ચહેરો સામે આવ્યો. તેણે યુવતી પર ઈસ્લામ અંગીકાર કરવા અને તેની સાથે લગ્ન કરવા દબાણ શરૂ કર્યું. જ્યારે યુવતીએ ના પાડી, ત્યારે તેણે તેને માર માર્યો, બંધક બનાવી અને તેના ખાનગી ફોટા તથા વીડિયો સોશિયલ મીડિયા પર વાયરલ કરવાની ધમકી આપી હતી.
પીડિતાએ કોઈક રીતે જીવ બચાવ્યો
લાંબા સમય સુધી ત્રાસ સહન કર્યા બાદ, યુવતી કોઈક રીતે નફીસના ચુંગાલમાંથી ભાગી છૂટી હતી અને પરિવારનો સંપર્ક કર્યો હતો. પરિવારજનો તાત્કાલિક દિલ્હી પહોંચ્યા અને યુવતીને હેમખેમ લખનૌ પરત લાવ્યા હતા. ઘરે પરત આવ્યા બાદ પીડિતાએ તેની સાથે થયેલી તમામ આપવીતી વર્ણવી હતી.
પોલીસ સ્ટેશનનો ઘેરાવો અને ઉગ્ર વિરોધ
પીડિતાના પરિવારે આરોપ લગાવ્યો છે કે તેઓ ૨૧ ફેબ્રુઆરીના રોજ જાનકીપુરમ પોલીસ સ્ટેશનમાં લેખિત ફરિયાદ લઈને ગયા હતા, પરંતુ પોલીસે કોઈ કાર્યવાહી કરી નહોતી. દરમિયાન આરોપી તરફથી સતત ધમકીઓ મળતી રહી હતી. પોલીસની નિષ્ક્રિયતાથી કંટાળીને રવિવારે રાત્રે પીડિત પરિવાર બજરંગ દળના કાર્યકરો સાથે પોલીસ સ્ટેશન પહોંચ્યો હતો.
•    ધરણા અને સૂત્રોચ્ચાર: કાર્યકરોએ પોલીસ સ્ટેશનની બહાર ધરણા કર્યા અને પોલીસ વિરુદ્ધ સૂત્રોચ્ચાર કર્યા.
•    પોલીસની કાર્યવાહી: મામલો ગરમાતા પોલીસે તાત્કાલિક અસરથી નફીસ ખાન વિરુદ્ધ કેસ દાખલ કર્યો અને તપાસ તેજ કરી છે.
ઇન્સ્પેક્ટર વિનોદ તિવારીએ જણાવ્યું હતું કે, "અમે કેસ નોંધી લીધો છે અને પુરાવાઓના આધારે આરોપીની ધરપકડ માટે ચક્રો ગતિમાન કર્યા છે."