અબુ ધાબી:  સંયુક્ત આરબ અમીરાત માં શાંતિ અને ભાઈચારાના પ્રતીક સમાન ભવ્ય BAPS હિન્દુ મંદિરને વર્તમાન ભૌગોલિક-રાજકીય અસ્થિરતા અને યુદ્ધના માહોલ વચ્ચે અસ્થાયી રૂપે બંધ કરવાનો નિર્ણય લેવામાં આવ્યો છે. મંદિર પ્રશાસને સત્તાવાર જાહેરાત કરતા જણાવ્યું છે કે સોમવારથી આગામી સૂચના સુધી કોઈ પણ મુલાકાતી કે શ્રદ્ધાળુ મંદિર પરિસરમાં પ્રવેશ કરી શકશે નહીં. અગાઉ આ પ્રતિબંધ 9 માર્ચ, 2026 સુધી અમલમાં હતો, પરંતુ મધ્ય-પૂર્વમાં ઈરાન, ઈઝરાયેલ અને અમેરિકા વચ્ચે વણસતી જતી સ્થિતિને ધ્યાનમાં રાખીને સુરક્ષાના ભાગરૂપે આ મુદત અનિશ્ચિતકાળ સુધી લંબાવવામાં આવી છે. જોકે, મંદિરની અંદર બિરાજમાન સંતો અને સ્વામીઓ દ્વારા નિયમિત પૂજા-અર્ચના ચાલુ રહેશે અને તેઓ વિશ્વ શાંતિ માટે ખાસ પ્રાર્થનાઓ કરશે.

₹700 કરોડના ખર્ચે બનેલું આ સ્થાપત્ય માત્ર એક મંદિર નથી, પરંતુ તે ભારતીય સંસ્કૃતિ અને UAE ના પરસ્પર વિશ્વાસનું જીવંત ઉદાહરણ છે. 27 એકરમાં ફેલાયેલા આ મંદિરના નિર્માણમાં ઇટાલિયન માર્બલ અને રાજસ્થાની રેતીના પથ્થરોનો ઉપયોગ કરવામાં આવ્યો છે, જેમાં લોખંડ કે સ્ટીલનો સહેજ પણ પ્રયોગ થયો નથી. મંદિરની દિવાલો પર આરબ સંસ્કૃતિના ઊંટ અને ઘોડાઓની સાથે હિન્દુ ધર્મની પવિત્ર વાર્તાઓ કંડારવામાં આવી છે. પરિસરમાં ગંગા અને યમુના નદીના પ્રતીકાત્મક પ્રવાહો અને બનારસ ઘાટ જેવું એમ્ફીથિયેટર મુલાકાતીઓને ભારતની પવિત્રતાનો અહેસાસ કરાવે છે, પરંતુ હાલના યુદ્ધના ભણકારાએ આ દિવ્ય શાંતિને હંગામી ધોરણે અટકાવી દીધી છે.

મંદિર પ્રશાસને શ્રદ્ધાળુઓને કોઈપણ પ્રકારની અફવાઓથી દૂર રહેવા અને સ્થાનિક સરકારની સુરક્ષા માર્ગદર્શિકાનું પાલન કરવા નમ્ર વિનંતી કરી છે. નોંધનીય છે કે આ મંદિરના નિર્માણમાં હિન્દુ, મુસ્લિમ, શીખ, ખ્રિસ્તી અને જૈન સમુદાયના લોકોએ સાથે મળીને કામ કર્યું હતું, જે વૈશ્વિક સંવાદિતાનું ઉત્તમ ઉદાહરણ પૂરું પાડે છે. અત્યારે જ્યારે મધ્ય-પૂર્વમાં મિસાઈલ હુમલા અને સૈન્ય કાર્યવાહી તેજ બની છે, ત્યારે હજારો મુસાફરો અને પ્રવાસીઓની સુરક્ષાને પ્રાથમિકતા આપીને આ કઠોર નિર્ણય લેવાયો છે. ભક્તો હવે આશા રાખી રહ્યા છે કે સ્થિતિ વહેલી તકે થાળે પડે અને 'અબુ ધાબીના આ રણદ્વીપ' માં ફરીથી ભક્તિના સૂર રેલાય.