ક્વેટા: પાકિસ્તાની સેના દ્વારા બલૂચિસ્તાનમાં આચરવામાં આવતા માનવાધિકાર ઉલ્લંઘનનો વધુ એક ભયાનક કિસ્સો પ્રકાશમાં આવ્યો છે. એક અગ્રણી માનવાધિકાર સંગઠન 'PANK' અને 'બલોચ યાકજેહાતી કમિટી' (BYC) એ આરોપ લગાવ્યો છે કે પાકિસ્તાની સુરક્ષા દળોએ છેલ્લા કેટલાક દિવસોમાં કોઈપણ કાનૂની પ્રક્રિયા કે કોર્ટના આદેશ વિના સાત બલોચ નાગરિકોની નિર્મમ હત્યા કરી છે.
બે સગા ભાઈઓની કરુણ કહાની
અવરણ જિલ્લાના બે સગા ભાઈઓ, નાદિલ બલોચ અને શેર જાનની હત્યાએ સમગ્ર વિસ્તારમાં રોષ ફેલાવ્યો છે. નાદિલને ચાર મહિના સુધી ગેરકાયદેસર અટકાયતમાં રાખ્યા બાદ ૮ માર્ચે તેનો ગોળીઓથી વીંધાયેલો મૃતદેહ ફેંકી દેવામાં આવ્યો હતો. તેના ભાઈ શેર જાનનો વિકૃત મૃતદેહ પણ તે જ દિવસે મળી આવ્યો હતો. આ ભાઈઓને અગાઉ સુરક્ષા એજન્સીઓ દ્વારા બળજબરીથી ઉપાડી જવામાં આવ્યા હતા.
ડેથ સ્ક્વોડનો આતંક: યુવાન ડ્રાઈવરો નિશાન પર
૫ માર્ચે પંજગુર જિલ્લામાં ૨૦ વર્ષીય નિયાઝ અને ઝાકિર નામના બે યુવાન ડ્રાઈવરોની હત્યા કરવામાં આવી હતી. આટલું જ નહીં, ૧૯ વર્ષીય ઉમર જાન નામના અન્ય એક ડ્રાઈવરને પણ મોતને ઘાટ ઉતારી દેવામાં આવ્યો હતો. માનવાધિકાર સંગઠનોનું કહેવું છે કે પાકિસ્તાન સમર્થિત 'ડેથ સ્ક્વોડ' દ્વારા આ હત્યાઓ કરી બલૂચિસ્તાનમાં ડરનું વાતાવરણ ઉભું કરવામાં આવી રહ્યું છે.
વકીલની હત્યા અને નકલી એન્કાઉન્ટરનો ખેલ
૬ માર્ચે પંજગુર જિલ્લામાં વકીલ હમ્મલ હસનીની પણ પાકિસ્તાન ફ્રન્ટિયર કોર્પ્સ દ્વારા હત્યા કરવામાં આવી હતી. BYC ના જણાવ્યા મુજબ, પાકિસ્તાની અધિકારીઓ બલોચ નાગરિકોને ઉપાડી જાય છે અને પછી નકલી એન્કાઉન્ટરમાં તેમને 'આતંકવાદી' જાહેર કરીને મારી નાખે છે અથવા કોઈપણ સમજૂતી આપ્યા વિના તેમના મૃતદેહો પરિવારને સોંપી દે છે.
ન્યાય માટે વૈશ્વિક સ્તરે માંગ
માનવાધિકાર સંગઠનોએ આ ક્રૂરતાની સ્વતંત્ર અને પારદર્શક તપાસની માંગ કરી છે. પંકે જણાવ્યું કે બલૂચિસ્તાનમાં 'મારો અને ફેંકી દો' (Kill and Dump) ની નીતિ ચરમસીમાએ છે. જો આંતરરાષ્ટ્રીય સમુદાય અત્યારે મૌન રહેશે, તો નિર્દોષ યુવાનોની હત્યાનો આ સિલસિલો ક્યારેય અટકશે નહીં.