નવી દિલ્હી, તા. 10: પશ્ચિમ એશિયા (મિડલ ઈસ્ટ) માં ઈરાન અને ઈઝરાયલ વચ્ચે ફાટી નીકળેલા ભીષણ યુદ્ધને કારણે પેદા થયેલી કટોકટી વચ્ચે ભારત સરકાર પોતાના નાગરિકોને બચાવવા માટે યુદ્ધના ધોરણે કામ કરી રહી છે. વિદેશ મંત્રી એસ. જયશંકરે ગઈકાલે રાજ્યસભામાં મહત્વની માહિતી આપતા જણાવ્યું હતું કે, અત્યાર સુધીમાં અંદાજે 67,000 ભારતીયો સુરક્ષિત રીતે આંતરરાષ્ટ્રીય સરહદો ઓળંગીને વતન પરત ફરી ચૂક્યા છે. પશ્ચિમ એશિયામાં વધતા જતા તણાવ વચ્ચે ભારતીય નાગરિકોની સુરક્ષા સુનિશ્ચિત કરવી એ સરકારની સર્વોચ્ચ પ્રાથમિકતા છે.
સ્થિતિ કેમ વણસી?
આ આખી કટોકટી 28 ફેબ્રુઆરીએ ઈરાન પર થયેલા યુએસ-ઈઝરાયલી સંયુક્ત હુમલા બાદ શરૂ થઈ છે, જેમાં ઈરાનના સુપ્રીમ લીડર અને અન્ય મુખ્ય સભ્યોના મૃત્યુ બાદ ઈરાની નેતૃત્વનું પતન થયું છે. સપ્તાહના અંતે તેલના ડેપો અને પાણીના પ્લાન્ટ્સ પર થયેલા નવા હુમલાઓએ પરિસ્થિતિને વધુ ગંભીર બનાવી દીધી છે. વિદેશ મંત્રીએ નોંધ્યું હતું કે ભૂરાજકીય વાતાવરણ નોંધપાત્ર રીતે બગડ્યું છે અને આ સંઘર્ષ હવે અન્ય દેશોમાં પણ ફેલાઈ રહ્યો છે.
પીએમ મોદીની સીધી નજર
જયશંકરે ગૃહને ખાતરી આપી હતી કે વડાપ્રધાન નરેન્દ્ર મોદી પોતે આ સમગ્ર વિકાસ પર નજીકથી નજર રાખી રહ્યા છે. વડાપ્રધાનની અધ્યક્ષતામાં ‘સુરક્ષા અંગેની કેબિનેટ સમિતિ’ (CCS) આ કટોકટીના ઉકેલ માટે સતત સંકલન કરી રહી છે. ભારત સરકારે તમામ પક્ષોને સંયમ રાખવા અને ‘સંવાદ તથા રાજદ્વારી’ માર્ગ અપનાવવા વિનંતી કરી છે. ભારતનું માનવું છે કે માત્ર વાતચીત દ્વારા જ આ તણાવ ઓછો કરી શકાય છે.
ઊર્જા સુરક્ષા અને વિપક્ષનો હોબાળો
રાજ્યસભામાં વિદેશ મંત્રીના નિવેદન દરમિયાન વિપક્ષી સાંસદોએ સૂત્રોચ્ચાર કરીને ઊર્જા સુરક્ષા અને ડાયસ્પોરાની સલામતી અંગે નિયમ 176 હેઠળ સંપૂર્ણ ચર્ચાની માંગ કરી હતી. ભારત માટે પશ્ચિમ એશિયા એ કાચા તેલનો મુખ્ય સ્ત્રોત હોવાથી, ત્યાંના યુદ્ધની અસર ભારતના ઈંધણના ભાવ પર ન પડે તે માટે પણ સરકાર સતર્ક છે. જયશંકરે સ્પષ્ટ કર્યું કે સરકાર તમામ પ્રતિકૂળ સંજોગોમાં ભારતીય મુસાફરો અને ત્યાં વસતા ડાયસ્પોરાની પડખે ઊભી છે.