તેહરાન: વિશ્વ અત્યારે બીજા એક મોટા યુદ્ધની જ્વાળાઓમાં લપેટાઈ રહ્યું હોય તેવું લાગી રહ્યું છે. ઈરાન પર અમેરિકા અને ઈઝરાયેલના સંયુક્ત હુમલાઓ વચ્ચે, યુએસ સેન્ટ્રલ કમાન્ડ (CENTCOM) એ 'ઓપરેશન એપિક ફ્યુરી' (Operation Epic Fury) ના પ્રથમ 10 દિવસનો સત્તાવાર અહેવાલ જાહેર કર્યો છે. આ અહેવાલ દર્શાવે છે કે અમેરિકાએ ઈરાનના લશ્કરી ઠેકાણાઓ અને સુરક્ષા પ્રણાલીઓને તોડી પાડવા માટે અત્યંત ઘાતક હથિયારોનો ઉપયોગ કર્યો છે.
B-1 બોમ્બર્સ અને A-10 જેટ્સની જોડીએ વેર્યો વિનાશ
અમેરિકાએ આ ઓપરેશનમાં પોતાના સૌથી શક્તિશાળી B-1 લાન્સર બોમ્બર્સ ઉતાર્યા છે, જે પલકવારમાં ટનબંધ વિસ્ફોટકો વરસાવવાની ક્ષમતા ધરાવે છે. તેની સાથે જ 'ટેન્ક કિલર' તરીકે ઓળખાતા A-10 એટેક જેટ્સે જમીન પર રહેલા ઈરાની સૈન્ય લક્ષ્યોને નિશાન બનાવ્યા છે. CENTCOM ના જણાવ્યા અનુસાર, આ હુમલાઓનો મુખ્ય ઉદ્દેશ્ય ઈરાનની રડાર સિસ્ટમ અને મિસાઈલ લોન્ચિંગ સાઈટ્સને નષ્ટ કરવાનો છે, જેથી કોઈ પણ તાત્કાલિક ખતરાને અટકાવી શકાય.
રાષ્ટ્રપતિના આદેશ પર 'ઓપરેશન એપિક ફ્યુરી'
અમેરિકાના રાષ્ટ્રપતિના સીધા નિર્દેશ હેઠળ શરૂ કરાયેલ આ ઓપરેશન અત્યંત આક્રમક રીતે આગળ વધી રહ્યું છે. CENTCOM એ પોતાના સોશિયલ મીડિયા એકાઉન્ટ પર સ્પષ્ટ કર્યું છે કે તેમના દળો ઈરાનની સુરક્ષા દીવાલોને તોડવા માટે સતત હુમલા કરી રહ્યા છે. જે સ્થળો પરથી ઈઝરાયેલ કે અમેરિકી હિતોને જોખમ છે, તેને પ્રાથમિકતાના ધોરણે ટાર્ગેટ કરવામાં આવી રહ્યા છે.
ભયના ઓથાર હેઠળ પશ્ચિમ એશિયા
છેલ્લા 10 દિવસથી ચાલી રહેલા આ વિનાશક હુમલાઓને કારણે પશ્ચિમ એશિયામાં ભારે તણાવની સ્થિતિ છે. એક તરફ ઈરાન વળતા પ્રહારની ધમકી આપી રહ્યું છે, તો બીજી તરફ અમેરિકા પોતાની અત્યાધુનિક સૈન્ય સંપત્તિના જોરે ઈરાનને નબળું પાડવાના પ્રયાસો કરી રહ્યું છે. ઓપરેશનના આગામી દિવસોમાં આ હુમલાઓ વધુ ઉગ્ર બને તેવી શક્યતા નકારી શકાય તેમ નથી.