નવી દિલ્હી: સંસદના બજેટ સત્રના બીજા ભાગમાં આજે લોકસભામાં ભારે રાજકીય ગરમાવો જોવા મળ્યો હતો. વાયનાડના સાંસદ પ્રિયંકા ગાંધી વાડ્રાએ તેમના ભાષણ દરમિયાન કેન્દ્ર સરકાર પર આકરા પ્રહારો કર્યા હતા. તેમણે મક્કમતાથી જણાવ્યું હતું કે વિપક્ષના નેતા રાહુલ ગાંધી છેલ્લા ૧૨ વર્ષમાં આ સરકાર સામે ક્યારેય ઝૂક્યા નથી અને સરકાર તેમના દ્વારા બોલાતા સત્યને પચાવી શકવા અસમર્થ છે.
રિજિજુના 'સ્મિત' વાળા કટાક્ષનો વળતો જવાબ
સંસદીય બાબતોના મંત્રી કિરેન રિજિજુએ ચર્ચા દરમિયાન પ્રિયંકા ગાંધીના વખાણ કરતા કોંગ્રેસ પર કટાક્ષ કર્યો હતો કે, જો રાહુલને બદલે પ્રિયંકાને વિપક્ષના નેતા બનાવવામાં આવ્યા હોત તો કોંગ્રેસનું પ્રદર્શન વધુ સારું હોત. તેમણે ઉમેર્યું કે, "પ્રિયંકાજી ઓછામાં ઓછું ગૃહમાં બેસે છે, સાંભળે છે અને હસે પણ છે." આ ટિપ્પણીનો જવાબ આપતા પ્રિયંકાએ કહ્યું કે, "હું એટલે હસી રહી હતી કારણ કે ભાજપના નેતાઓ દિવસ-રાત જે નેહરુજીની ટીકા કરે છે, આજે પોતાની દલીલો સાચી ઠેરવવા એ જ નેહરુજીના શબ્દોનો સહારો લઈ રહ્યા છે."
નેહરુજીના સંદર્ભે જામ્યું વાકયુદ્ધ
કિરેન રિજિજુએ ૧૯૫૪ના એક કિસ્સાને ટાંકીને જવાહરલાલ નેહરુના અવલોકનો રજૂ કર્યા હતા. આ બાબતે પ્રિયંકાએ કટાક્ષ કર્યો કે ભાજપને અચાનક નેહરુજી પ્રત્યે આદર જાગ્યો છે અને તેઓ હવે સ્વીકારી રહ્યા છે કે નેહરુજીએ લોકશાહીને મજબૂત બનાવી હતી. તેમણે વધુમાં ઉમેર્યું કે રાહુલ ગાંધી સતત એવા પ્રશ્નો ઉઠાવે છે જે સરકારને અસ્વસ્થ કરી દે છે, અને તે જ કારણ છે કે શાસક પક્ષ તેમને નિશાન બનાવે છે.
ઝૂકશે નહીં વિપક્ષનો અવાજ
પોતાના સંબોધનના અંતે પ્રિયંકા ગાંધીએ ભારપૂર્વક જણાવ્યું હતું કે વિપક્ષનો અવાજ દબાવવાના ગમે તેટલા પ્રયાસો થાય, પરંતુ રાહુલ ગાંધી અને કોંગ્રેસ જનતાના પ્રશ્નો ઉઠાવતા રહેશે. તેમણે કહ્યું કે સરકાર વિપક્ષના નેતાના નીડર વલણથી ડરેલી છે. ૧૦ માર્ચની આ ચર્ચામાં જે રીતે ભાઈ-બહેનની જોડીએ સરકારને ઘેરવાનો પ્રયાસ કર્યો છે, તેણે આગામી દિવસોમાં સંસદ વધુ તોફાની બનવાના સંકેત આપ્યા છે.