ફુકેટ:થાઈલેન્ડના પ્રખ્યાત પ્રવાસન સ્થળ ફુકેટમાં એક મોટી વિમાન દુર્ઘટના ટળી હતી. હૈદરાબાદથી ૧૩૩ મુસાફરોને લઈને ફુકેટ પહોંચેલી એર ઈન્ડિયા એક્સપ્રેસની ફ્લાઇટ (IX-938) જ્યારે રનવે પર લેન્ડ કરી રહી હતી, ત્યારે અચાનક તેનું 'નોઝ ગિયર' (આગળનું વ્હીલ) તૂટી ગયું હતું. વિમાન જેવું જમીન પર ઉતર્યું કે તરત જ તેનું આગળનું પૈડું અલગ થઈ ગયું હતું અને વિમાન રનવે પર જ અટકી ગયું હતું.
 જ્યારે આ અકસ્માત થયો ત્યારે વિમાનમાં ૧૩૩ મુસાફરો સવાર હતા. લેન્ડિંગ વખતે આવેલા જોરદાર આંચકાથી મુસાફરોમાં ગભરાટ ફેલાઈ ગયો હતો. જોકે, રાહતની વાત એ છે કે આ ઘટનામાં કોઈને પણ ઈજા થઈ નથી. એરપોર્ટના ઈમરજન્સી પ્રોટોકોલ હેઠળ તમામ મુસાફરોને તાત્કાલિક અને સુરક્ષિત રીતે વિમાનમાંથી બહાર કાઢવામાં આવ્યા હતા. એર ઈન્ડિયા એક્સપ્રેસે પુષ્ટિ કરી છે કે તેમના ક્રૂ મેમ્બર્સ દ્વારા તમામ સુરક્ષા નિયમોનું પાલન કરવામાં આવ્યું હતું.
આ અકસ્માત એટલો ગંભીર હતો કે બોઇંગ ૭૩૭ મેક્સ ૮ વિમાન રનવેની વચ્ચે જ ફસાઈ ગયું હતું. આને કારણે ફુકેટ ઇન્ટરનેશનલ એરપોર્ટના સત્તાવાળાઓને તાત્કાલિક રનવે બંધ કરવાની ફરજ પડી હતી. રનવે બંધ થવાને કારણે વિશ્વભરમાંથી આવતી અન્ય ઘણી ફ્લાઇટ્સને ડાયવર્ટ કરવામાં આવી હતી અથવા તેમના સમયમાં ફેરફાર કરવામાં આવ્યો હતો, જેનાથી મુસાફરોને મુશ્કેલીનો સામનો કરવો પડ્યો હતો.
આ ઘટનામાં વપરાયેલું વિમાન બોઇંગ ૭૩૭ મેક્સ ૮ (Boeing 737 MAX 8) મોડેલનું છે, જે અગાઉ પણ વિશ્વભરમાં અનેક ટેકનિકલ સમસ્યાઓને કારણે વિવાદોમાં રહ્યું છે. ભારતીય ઉડ્ડયન નિયામક DGCA આ મામલાની ગંભીરતાથી નોંધ લેશે અને તપાસ કરવામાં આવશે કે આ અકસ્માત માનવીય ભૂલને કારણે થયો છે કે વિમાનમાં કોઈ યાંત્રિક ખામી હતી. હાલમાં વિમાનને રનવે પરથી હટાવવાની અને રનવેને ફરીથી કાર્યરત કરવાની કામગીરી યુદ્ધના ધોરણે ચાલી રહી છે