લખનૌ:  ઉત્તર પ્રદેશની 2027ની વિધાનસભા ચૂંટણીનું રણશિંગું અત્યારથી જ ફૂંકાઈ ગયું છે. રાજ્યની વસ્તીના 22% હિસ્સો ધરાવતા દલિત મતદારોને રીઝવવા કોંગ્રેસ નેતા રાહુલ ગાંધી આવતીકાલે, 13 માર્ચે લખનૌના ઇન્દિરા ગાંધી પ્રતિષ્ઠાન ખાતે કાંશીરામની જન્મજયંતિની ઉજવણીમાં હાજરી આપશે. આ કાર્યક્રમમાં રાહુલ ગાંધી દલિત સમુદાય માટે એક 'ઐતિહાસિક જાહેરાત' કરી શકે છે, જેનો સીધો હેતુ બસપાના નબળા પડી રહેલા પાયાનો લાભ ઉઠાવી દલિતોને ફરી કોંગ્રેસ તરફ વાળવાનો છે. કોંગ્રેસનું માનવું છે કે 1990ના દાયકા પહેલા જે દલિતો તેમનો પરંપરાગત વોટબેંક હતા, તેમને ફરી સાથે લાવ્યા વગર યુપીમાં સત્તાના સિંહાસન સુધી પહોંચવું અશક્ય છે.

બીજી તરફ, સમાજવાદી પાર્ટી પણ આ દિવસને 'PDA દિવસ' તરીકે ઉજવીને દલિતોમાં પોતાની પકડ મજબૂત કરવા મથામણ કરી રહી છે. સપા અને કોંગ્રેસ વચ્ચે દલિતોના 'સાચા હિતેચ્છુ' સાબિત થવાની સ્પર્ધા જામી છે. કોંગ્રેસે બસપા સુપ્રીમો માયાવતી પર આકરા પ્રહારો કરતા કહ્યું છે કે કાંશીરામના વારસા પર કોઈ એક પક્ષનો ઈજારો નથી. બસપાની ઘટતી જતી બેઠકો અને લોકસભામાં થયેલા સફાયા બાદ હવે વિપક્ષી ગઠબંધન આ વોટબેંકને ભાજપ અને બસપાના કબજામાંથી મુક્ત કરાવવા એડીચોટીનું જોર લગાવી રહ્યું છે.

ભાજપે કોંગ્રેસના આ પ્રયાસોને 'દલિતો સાથેની છેતરપિંડી' ગણાવીને પલટવાર કર્યો છે. ભાજપના પ્રવક્તાએ આક્ષેપ કર્યો છે કે દાયકાઓ સુધી સત્તામાં રહ્યા બાદ પણ કોંગ્રેસે દલિતોને આવાસ કે શૌચાલય જેવી પાયાની સુવિધાઓ આપી નથી, જે મોદી સરકારમાં શક્ય બની છે. જોકે, રાજકીય નિષ્ણાતો માને છે કે જો રાહુલ ગાંધી દલિતોને આકર્ષવામાં સફળ રહે છે, તો ઉત્તર પ્રદેશમાં ત્રિપાંખિયા જંગના સમીકરણો સંપૂર્ણપણે બદલાઈ જશે. કાલે થનારી જાહેરાત યુપીના રાજકારણમાં દલિતોના ભાવિ અને કોંગ્રેસના પુનરુત્થાન માટે નિર્ણાયક સાબિત થઈ શકે છે.