નવી દિલ્હી :મધ્ય પૂર્વમાં તણાવ હદ વટાવી ગયો છે. બુધવારે, ઈરાની દળોએ અમેરિકાની માલિકીના ક્રૂડ ઓઈલ ટેન્કર સેફસી વિષ્ણુ પર પાણીની અંદરના ડ્રોનથી હુમલો કર્યો, જેમાં એક ભારતીય નાવિકનું મોત થયું.

રાત્રે ઈરાકના બસરા નજીક બની હતી, જ્યાં આ જહાજ અમેરિકા-ઈઝરાયલી લશ્કરી કાર્યવાહીના જવાબમાં ઈરાની હુમલાઓનો ભાગ હતું.

આ વિડીયોમાં રાતનું ગાઢ અંધારુ અને યુદ્ધના પડછાયામાં છવાયેલો સમુદ્ર બતાવવામાં આવ્યો છે, જ્યારે સેફસી વિષ્ણુ જહાજ ઇરાકના બસરા નજીક પર્સિયન ગલ્ફમાં સફર કરી રહ્યું છે. અચાનક, એક આત્મઘાતી બોટ હુમલો કરે છે. આગનો ગોળો ફાટી નીકળે છે.

આ સાથે જ સમુદ્રની સપાટી ઉપર જવાળાઓ જોવા મળી, જાણે કોઈ વિશાળ મેદાન સળગી રહ્યું હોય. આ દ્રશ્ય કોઈ હોલીવુડની એક્શન ફિલ્મ જેવું લાગતું હતું, પણ તે વાસ્તવિક હતું. વહાણમાં સવાર લોકો ચીસો પાડતા અને બચાવ કાર્યમાં રોકાયેલા જોવા મળ્યા. ઓઇલથી તરબોળ સમુદ્રની સપાટી સળગી રહી હતી, જ્વાળાઓ ઉંચી ઉછળી રહી હતી.

એનડીટીવી અનુસાર, માર્શલ ટાપુઓના ધ્વજ હેઠળ ઉડતું ટેન્કર અમેરિકન કંપની સેફસી ટ્રાન્સપોર્ટનું છે. માલ્ટિઝ ધ્વજવાળા જહાજ ઝેફાયરોસ (ગ્રીસની માલિકીનું) ને પણ નિશાન બનાવવામાં આવ્યું હતું. ઈરાની રાજ્ય પ્રસારણકર્તાઓ IRIB અને પ્રેસ ટીવીએ દાવો કર્યો હતો કે IRGC નૌકાદળે ઉત્તરી પર્સિયન ગલ્ફમાં જહાજો પર પાણીની અંદર ડ્રોન હુમલા કર્યા હતા. વિડિયોમાં રાત્રિના અંધારામાં અને ઓઇલથી ઢંકાયેલા સમુદ્રમાં જહાજને લપેટતી જ્વાળાઓનું ભયાનક દ્રશ્ય જોવા મળ્યું હતું. બચાવ જહાજમાંથી લોકો ચીસો પાડતા અને ઈશારા કરતા જોવા મળ્યા હતા. 

જહાજ પર સવાર એક ભારતીય ખલાસીનું મોત થયું હતું, જ્યારે 15 અન્ય લોકો બચાવ બોટમાં સુરક્ષિત રીતે ભાગી ગયા હતા. બગદાદમાં ભારતીય દૂતાવાસે આ વાતની પુષ્ટિ કરી હતી. દૂતાવાસે કહ્યું હતું કે- અમે ઇરાકી અધિકારીઓ અને બચાવાયેલા ભારતીય ખલાસીઓ સાથે નિયમિત સંપર્કમાં છીએ અને શક્ય તમામ સહાય પૂરી પાડી રહ્યા છીએ. મૃતકોના પરિવાર પ્રત્યે ઊંડી સંવેદના. બચી ગયેલા ભારતીય ખલાસીઓને સલામત સ્થળે ખસેડવામાં આવ્યા છે. 

ઈરાને ચેતવણી આપ્યા બાદ આ હુમલો કરવામાં આવ્યો હતો કે તે હોર્મુઝ સ્ટ્રેટમાંથી પસાર થતા જહાજોને નિશાન બનાવશે, જે વૈશ્વિક ઓઇલ પુરવઠાનો 20 ટકા હિસ્સો ધરાવે છે. આ હુમલાને કારણે વૈશ્વિક ઓઇલના ભાવમાં વધારો થયો હતો. યુએસ વહીવટીતંત્રે જણાવ્યું છે કે તે સ્ટ્રેટમાં ખતરાઓનો સામનો કરવા માટે પગલાં લઈ રહ્યું છે.