મુંબઈ : પશ્ચિમ એશિયામાં સર્જાયેલી યુદ્ધ જેવી ગંભીર સ્થિતિ અને શિપિંગ માર્ગો પર વધી રહેલા હુમલાઓ વચ્ચે ભારતીય પ્રવાસીઓ માટે મહત્વના સમાચાર આવ્યા છે. અકાસા એર (Akasa Air) એ સલામતીની વિગતવાર સમીક્ષા કર્યા બાદ જેદ્દાહથી ભારતની ફ્લાઇટ્સ મર્યાદિત ધોરણે ફરી શરૂ કરવાની જાહેરાત કરી છે. ૩૧ માર્ચ સુધી અમદાવાદ, મુંબઈ, બેંગલુરુ, કોચી અને કોઝિકોડ જેવા મુખ્ય શહેરો માટે પસંદગીની ફ્લાઇટ્સ ઓપરેટ કરવામાં આવશે, જેથી મુસાફરો સુરક્ષિત રીતે ભારત પરત ફરી શકે.
ફ્લાઇટ્સનું નવું સમયપત્રક
અકાસા એરના સત્તાવાર શેડ્યૂલ મુજબ, ૧૨ માર્ચથી ૧૫ માર્ચ દરમિયાન દરરોજ રાત્રે ૧૧:૫૫ વાગ્યે જેદ્દાહથી મુંબઈ માટે એક ફ્લાઇટ રવાના થશે. ૧૬ માર્ચથી આ સંખ્યા વધારીને બે કરવામાં આવશે, જે રાત્રે ૯:૪૫ અને ૧૧:૫૫ વાગ્યે ઉપડશે. જોકે, પ્રવાસીઓએ ખાસ નોંધ લેવી કે ૨૦ માર્ચથી ૨૬ માર્ચ દરમિયાન મુંબઈ માટે કોઈ ફ્લાઇટ ઉપલબ્ધ રહેશે નહીં. મુંબઈથી જેદ્દાહ જવા માંગતા પ્રવાસીઓ માટે પણ ૧૨ માર્ચથી ૩૧ માર્ચ સુધીના ચોક્કસ દિવસો અને સમય જાહેર કરવામાં આવ્યા છે.
અન્ય શહેરોમાં ફ્લાઇટ્સ સ્થગિત
મધ્ય પૂર્વમાં વધતા તણાવને ધ્યાનમાં રાખીને એરલાઇને સાવચેતીના પગલાં પણ લીધા છે. રિયાધ જતી અને ત્યાંથી આવતી ફ્લાઇટ્સ ૧૪ માર્ચ સુધી બંધ રાખવામાં આવી છે. આ ઉપરાંત અબુ ધાબી, દોહા અને કુવૈત સિટીની ફ્લાઇટ્સ પણ ૧૫ માર્ચ સુધી સ્થગિત રહેશે. એરલાઇને મુસાફરોને વિનંતી કરી છે કે એરપોર્ટ પર પહોંચતા પહેલા સત્તાવાર વેબસાઇટ પર ફ્લાઇટની સ્થિતિ (Status) ચોક્કસ તપાસી લેવી.
મુસાફરોની સુરક્ષા સર્વોપરી
હોર્મુઝની સામુદ્રધુનીમાં જહાજો પર થઈ રહેલા હુમલા અને ઈરાન-અમેરિકા વચ્ચેના સંઘર્ષને કારણે હવાઈ માર્ગો પર પણ સતર્કતા રાખવામાં આવી રહી છે. ભારત સરકાર અને વિદેશ મંત્રાલય ઈરાનમાં ફસાયેલા ભારતીયોને મદદ કરી રહ્યા છે, ત્યારે અકાસા એરનું આ પગલું ખાડી દેશોમાં રહેતા ભારતીય વ્યાવસાયિકો અને યાત્રાળુઓ માટે મોટી રાહત સમાન છે. જેદ્દાહથી શરૂ કરાયેલી આ ફ્લાઇટ્સ ખાસ કરીને એવા લોકો માટે આશીર્વાદરૂપ બનશે જેઓ તાત્કાલિક સ્વદેશ પરત ફરવા ઈચ્છે છે.