બાગપત : ઉત્તર પ્રદેશના બાગપત જિલ્લાના એક ગામમાં ગુરુવારે લગ્નનો ઉત્સાહ ત્યારે માતમ અને હોબાળામાં ફેરવાઈ ગયો જ્યારે વરરાજાની ગર્લફ્રેન્ડ લગ્ન મંડપમાં આવી પહોંચી. વરરાજાની જાન કન્યાના દ્વારે પહોંચી જ હતી અને સ્વાગતની તૈયારીઓ ચાલી રહી હતી, ત્યારે જ આ યુવતીએ કન્યા પાસે જઈને વરરાજા સાથેના પોતાના અંગત ફોટા અને કોર્ટ મેરેજના પુરાવા બતાવ્યા હતા. આ જોઈને કન્યા ક્રોધે ભરાઈ હતી અને તેણે લગ્ન કરવાનો સ્પષ્ટ ઈનકાર કરી દીધો હતો.
વરરાજા ભાગી છૂટ્યો, સંબંધીઓ ફસાયા
જેવો લગ્ન મંડપમાં હોબાળો શરૂ થયો, વરરાજા સ્થિતિ પામી ગયો અને પોતાના મિત્રો સાથે તક જોઈને ભાગી છૂટ્યો. જોકે, કન્યા પક્ષના લોકોએ ગુસ્સામાં આવીને વરરાજાના પિતા, સાળા અને અન્ય સંબંધીઓને બંધક બનાવી લીધા હતા અને તેમની સાથે મારપીટ પણ કરી હતી. ઘટનાની જાણ થતા બાગપત કોતવાલી પોલીસ ઘટનાસ્થળે પહોંચી હતી અને બંધકોને મુક્ત કરાવ્યા હતા. આખરે પોલીસ સ્ટેશનમાં બંને પક્ષો વચ્ચે સમાધાન થયું હોવાનું જાણવા મળ્યું છે, પરંતુ આ હાઈવોલ્ટેજ ડ્રામા સમગ્ર વિસ્તારમાં ચર્ચાનો વિષય બન્યો છે.
સંભલમાં પોલીસની 'કડક સારવાર'ની ચેતવણી
લગ્નના આ કિસ્સાની સાથે જ સંભલ જિલ્લામાંથી પોલીસનો એક વીડિયો વાયરલ થઈ રહ્યો છે. સંભલના સીઓ (CO) કુલદીપ સિંહે શાંતિ સમિતિની બેઠકમાં મુસ્લિમ સમુદાયના લોકોને કડક શબ્દોમાં ચેતવણી આપી હતી. તેમણે ઈરાન અને ઈઝરાયેલ વચ્ચે ચાલી રહેલા યુદ્ધના સંદર્ભમાં જણાવ્યું કે, "જો તમને ઈરાન માટે આટલી જ ખંજવાળ આવતી હોય, તો વિમાન પકડીને ત્યાં લડવા જતા રહો, પણ અહીં સૂત્રોચ્ચાર કરીને કાયદો અને વ્યવસ્થા બગાડશો નહીં."
સૂત્રોચ્ચાર કરનારાઓ સામે લાલ આંખ
સીઓ કુલદીપ સિંહે વધુમાં ઉમેર્યું હતું કે બે દેશો વચ્ચેના સંઘર્ષની અસર જો ભારતમાં શાંતિ ભંગ કરવા માટે કરવામાં આવશે, તો પોલીસ તેની 'શ્રેષ્ઠ સારવાર' કરશે. આગામી તહેવારોને ધ્યાનમાં રાખીને લેવામાં આવેલી આ બેઠકમાં પોલીસ અધિકારીનો આ આકરો મિજાજ સોશિયલ મીડિયા પર અત્યંત વાયરલ થઈ રહ્યો છે. વહીવટીતંત્ર અત્યારે પશ્ચિમ એશિયાના તણાવની અસર સ્થાનિક કાયદો-વ્યવસ્થા પર ન પડે તે માટે સતર્ક છે.