મોરબી: મોરબી જિલ્લા લોકલ ક્રાઈમ બ્રાન્ચ (LCB) ના પોલીસ ઇન્સ્પેક્ટર એમ.પી. પંડ્યા અને તેમની ટીમે દારૂબંધીના કાયદાના કડક અમલીકરણના ભાગરૂપે એક મોટી સફળતા મેળવી છે. બાતમીના આધારે ચોટીલા-રાજકોટ હાઇવે પર મોરબી જિલ્લાની હદમાં આવેલી સુગર એન સ્પાઈસ હોટલ પાસે વોચ ગોઠવીને વિદેશી દારૂનો મોટો જથ્થો ભરેલું વાહન ઝડપી પાડવામાં આવ્યું છે. આ કામગીરી વાંકાનેર તાલુકા પોલીસ મથકની હદમાં કરવામાં આવી હતી.

કરોડોની કિંમતનો વિદેશી દારૂ જપ્ત:
પોલીસ દરોડા દરમિયાન વાહનમાંથી પંજાબ રાજ્યની વિવિધ ડિસ્ટિલરીઓમાં ઉત્પાદિત થયેલ નામચીન બ્રાન્ડનો ભારતીય બનાવટનો વિદેશી દારૂ (IMFL) મળી આવ્યો હતો. જેમાં મેકડોવેલ્સ નં. ૧ ઓરીજનલ બ્લેન્ડેડ વ્હિસ્કી, રોયલ ચેલેન્જ ફાઈન રિઝર્વ વ્હિસ્કી, રોયલ સ્ટેગ સુપીરિયર વ્હિસ્કી, ઓલ સીઝન્સ ગોલ્ડ કલેક્શન રિઝર્વ વ્હિસ્કી અને કિંગફિશર એક્સ્ટ્રા સ્ટ્રોંગ પ્રીમિયમ બીયરનો સમાવેશ થાય છે. પોલીસે કુલ ૩૧,૭૫૨ નંગ બોટલો કબજે કરી છે, જેની બજાર કિંમત અંદાજે રૂ. ૧,૯૩,૪૭,૩૬૦/- જેટલી થવા જાય છે.

મુદ્દામાલ અને ધરપકડની વિગત:
આ ઓપરેશનમાં પોલીસે દારૂના જથ્થા ઉપરાંત રૂ. ૨૫,૦૦,૦૦૦/- ની કિંમતનું વાહન, રૂ. ૩,૨૦૦/- ની રોકડ રકમ અને રૂ. ૫,૦૦૦/- ની કિંમતનો મોબાઈલ ફોન મળી કુલ રૂ. ૨,૧૮,૫૫,૫૬૦/- નો મુદ્દામાલ જપ્ત કર્યો છે. સ્થળ પરથી વાહન ચાલક લલિતકુમાર પ્રતાપજી ખરાડી (રહે. ગામ ઝહેરાઝ, તહસીલ ખેરવાડા, જિલ્લો ઉદયપુર, રાજસ્થાન) ની અટકાયત કરી તેને વાંકાનેર તાલુકા પોલીસ સ્ટેશનને સોંપવામાં આવ્યો છે.

ત્રણ શખ્સો સામે તપાસનો ધમધમાટ:
આ ગુનામાં સંડોવાયેલા અન્ય ત્રણ શખ્સોને પોલીસે વોન્ટેડ જાહેર કર્યા છે. જેમાં ગેરકાયદેસર દારૂનો જથ્થો મોકલનાર અજાણ્યો શખ્સ, વાહન નંબર RJ 14 GP 4506 નો માલિક અને દારૂનો જથ્થો મંગાવનાર (રિસીવર) અજાણ્યા શખ્સનો સમાવેશ થાય છે.

કાયદેસરની કાર્યવાહી:
પોલીસે આ કેસમાં પ્રોહિબિશન એક્ટની વિવિધ કલમો ૬૫(એ)(ઈ), ૮૧, ૮૩, ૯૮(૨), ૧૧૬(બી) તેમજ ભારતીય ન્યાય સંહિતા (BNS) ૨૦૨૩ ની કલમો ૩૩૬(૨), ૩૩૬(૩), ૩૩૮ અને ૬૧(૨) મુજબ ગુનો નોંધી આગળની તપાસ હાથ ધરી છે. LCB મોરબી દ્વારા કરવામાં આવેલી આ મોટી કાર્યવાહીથી બુટલેગરોમાં ફફડાટ વ્યાપી ગયો છે.