પટણા :  બિહારની રાજધાની પટણામાં છેતરપિંડીનો એક એવો કિસ્સો સામે આવ્યો છે જેને સાંભળીને પોલીસ પણ ચોંકી ઉઠી છે. પટણાના ગર્દાનીબાગ વિસ્તારમાં આવેલી 'સત્ય ગેસ એજન્સી' પર કેટલાક ભેજાબાજ શખ્સો સત્તાના નશાનો ડોળ કરીને પહોંચ્યા હતા. પોતાને નાયબ મુખ્યમંત્રી સમ્રાટ ચૌધરીના કાર્યાલયના 'SDO' તરીકે ઓળખાવી, આ ઠગોએ એજન્સીના કર્મચારી સોનમ કુમાર પર રૂઆબ જમાવ્યો અને તાત્કાલિક 15 ગેસ સિલિન્ડરની માંગણી કરી. જ્યારે કર્મચારીએ વેરહાઉસ તપાસ્યું તો માત્ર 4 સિલિન્ડર હાજર હતા. આ વીઆઈપી ઠગોએ કોઈ પણ પ્રકારનું બુકિંગ કરાવ્યા વગર કે નિયમોનું પાલન કર્યા વગર "સાહેબનો ઓર્ડર છે" તેમ કહીને ચારેય સિલિન્ડર ગાડીમાં ભરી લીધા અને ત્યાંથી રફુચક્કર થઈ ગયા.

આ ઘટનાની જાણ જ્યારે ઉચ્ચ સ્તરે થઈ ત્યારે ડેપ્યુટી સીએમ સમ્રાટ ચૌધરીનું કાર્યાલય સફાળું જાગ્યું હતું. ડેપ્યુટી સીએમના અંગત સચિવ શૈલેન્દ્ર ઓઝાએ સત્તાવાર નિવેદન જારી કરીને આ આખા મામલાને પાયાવિહોણો અને ભ્રામક ગણાવ્યો છે. તેમણે મોટો ખુલાસો કરતા જણાવ્યું કે, ડેપ્યુટી સીએમ ઓફિસમાં 'SDO' જેવું કોઈ પદ જ હોતું નથી, જેનો અર્થ છે કે ઠગોએ ખૂબ જ આયોજનબદ્ધ રીતે ઓફિસના નામનો દુરુપયોગ કર્યો છે. સરકારે સ્પષ્ટ કર્યું છે કે સચિવાલય કે કોઈ પણ મંત્રીના કાર્યાલય દ્વારા આ પ્રકારે ગેસ એજન્સી પર દબાણ લાવીને સિલિન્ડર મંગાવવામાં આવ્યા નથી.

હાલમાં પટણા પોલીસે આ મામલે તપાસ તેજ કરી છે અને ગેસ એજન્સીના સીસીટીવી ફૂટેજ ખંગાળવામાં આવી રહ્યા છે. ડેપ્યુટી સીએમ કાર્યાલયે આદેશ આપ્યો છે કે જે કોઈ પણ વ્યક્તિએ સમ્રાટ ચૌધરીના નામનો ખોટો ઉપયોગ કરીને એજન્સીને છેતરી છે, તેની ધરપકડ કરીને કડક કાર્યવાહી કરવામાં આવે. આ ઘટનાએ એજન્સીઓના કર્મચારીઓની સુરક્ષા અને વીઆઈપી પ્રોટોકોલના નામે થતી છેતરપિંડી સામે લાલબત્તી ધરી છે. અધિકારીઓએ લોકોને પણ અપીલ કરી છે કે સત્તાવાર ઓળખપત્ર વગર કોઈ પણ વ્યક્તિના દબાણમાં આવીને સરકારી નિયમોનું ઉલ્લંઘન ન કરવું.