વોશિંગ્ટન : અમેરિકા અને ઈરાન વચ્ચેનો સંઘર્ષ હવે ચરમસીમાએ પહોંચ્યો છે. અમેરિકી રાષ્ટ્રપતિ ડોનાલ્ડ ટ્રમ્પે તેમના સોશિયલ મીડિયા પ્લેટફોર્મ 'ટ્રુથ સોશિયલ' પર ઈરાનને ખુલ્લેઆમ પડકાર ફેંકતા 'આતંકવાદી શાસનના સંપૂર્ણ નાશ'ની વાત કરી છે. ડ્રોન અને મિસાઈલ હુમલાઓના બીજા રાઉન્ડ બાદ ટ્રમ્પના આ નિવેદને વૈશ્વિક રાજકારણમાં ખળભળાટ મચાવી દીધો છે.
"નેતાઓ પૃથ્વી પરથી ભૂંસી નાખવામાં આવ્યા છે"
ટ્રમ્પે ખૂબ જ આક્રમક ભાષામાં લખ્યું કે, "ઈરાનની નૌકાદળ અને વાયુસેના હવે અસ્તિત્વમાં નથી. મિસાઈલો અને ડ્રોન નાશ પામી રહ્યા છે. અમારી પાસે અજોડ ફાયરપાવર અને અમર્યાદિત દારૂગોળો છે." તેમણે ઈરાનને 'પાગલ બેગ' (Mad bag) તરીકે સંબોધતા કહ્યું કે, ૪૭ વર્ષથી નિર્દોષોને મારનારા આ શાસનને અમેરિકાના ૪૭મા રાષ્ટ્રપતિ તરીકે ખતમ કરવું એ મારા માટે સન્માનની વાત છે.
મોજતબા ખામેનીના સમાચાર પર પ્રતિક્રિયા
ઈરાનના સુપ્રીમ લીડર મોજતબા ખામેની જીવિત છે કે નહીં તે અંગેની અટકળો વચ્ચે ટ્રમ્પે ટિપ્પણી કરી કે, "મને લાગે છે કે તેઓ કદાચ જીવિત છે પણ ગંભીર રીતે ક્ષતિગ્રસ્ત (Damaged) છે." બીજી તરફ, ઈરાનના સરકારી ટીવી પર મોજતબાએ એક સંદેશમાં જાહેરાત કરી છે કે ઈરાન પોતાના શહીદોના લોહીનો બદલો લેશે અને હોર્મુઝ સ્ટ્રેટ (Strait of Hormuz) બંધ કરીને અમેરિકી સૈન્ય મથકો પર હુમલો કરશે.
તેલના ભાવ અને રાજકીય વિવાદ
યુદ્ધના કારણે તેલના ભાવમાં થયેલા વધારા અંગે ટ્રમ્પે વિવાદાસ્પદ નિવેદન આપતા કહ્યું કે, આનાથી અમેરિકા નોંધપાત્ર કમાણી કરી શકે છે. આ નિવેદન બાદ રિપબ્લિકન પાર્ટીના જ કેટલાક સાંસદોમાં નારાજગી જોવા મળી છે. ટ્રમ્પે 'ધ ન્યૂ યોર્ક ટાઈમ્સ' જેવા મીડિયા આઉટલેટ્સ પર પણ નિશાન સાધ્યું અને દાવો કર્યો કે અમેરિકા આ યુદ્ધમાં સ્પષ્ટપણે જીતી રહ્યું છે.
પશ્ચિમ એશિયામાં વધી રહેલા આ તણાવને કારણે સમગ્ર વિશ્વમાં ઈંધણના ભાવ અને સુરક્ષાને લઈને ચિંતા વધી ગઈ છે. આગામી કલાકોમાં આ સંઘર્ષ કયું નવું વળાંક લે છે તેના પર દુનિયાની નજર છે.