બેંગલુરુ : કર્ણાટકમાં સત્તાધારી કોંગ્રેસ સરકાર માટે ત્યારે શરમજનક સ્થિતિ સર્જાઈ જ્યારે તેમના જ પક્ષના રામનગરના ધારાસભ્ય ઇકબાલ હુસૈને મુખ્યમંત્રી સિદ્ધારમૈયાના વર્ષ ૨૦૨૬-૨૭ ના બજેટની જાહેરમાં આકરી ટીકા કરી. હુસૈને વિપક્ષ ભાજપના સૂરમાં સૂર મિલાવતા સરકારની ઊંઘ ઉડાડી દીધી છે અને હવે તેમને પક્ષમાંથી બહારનો રસ્તો બતાવવાની માંગણીઓ જોર પકડી રહી છે.
"હું બજેટથી ખુશ નથી": ધારાસભ્યની વેદના
ઇકબાલ હુસૈન, જેઓ નાયબ મુખ્યમંત્રી ડી.કે. શિવકુમારના ખાસ સમર્થક ગણાય છે, તેમણે નારાજગી વ્યક્ત કરતા કહ્યું કે, "મેં મારા મતવિસ્તાર માટે ખાસ પેકેજ અને ગ્રાન્ટની માંગણી કરી હતી, પરંતુ મુખ્યમંત્રીએ મારી એક પણ વિનંતી સાંભળી નથી." તેઓ ખાસ કરીને બક્ષીકેરે તળાવ અને સિલ્ક રીલર્સ પાર્ક માટે કોઈ જોગવાઈ ન હોવાથી ગુસ્સે ભરાયા છે. તેમણે ઉમેર્યું કે, પૂરને કારણે તળાવ તૂટી પડતા લોકોએ ભારે નુકસાન વેઠ્યું છે, છતાં બજેટમાં તેમની ઉપેક્ષા કરવામાં આવી છે.
શિવકુમારનો બચાવ અને હુસૈનનો વળતો પ્રહાર
જ્યારે નાયબ મુખ્યમંત્રી ડી.કે. શિવકુમારે બચાવ કરતા કહ્યું કે બજેટમાં રામનગર માટે નવી જિલ્લા કોર્ટ સંકુલની જાહેરાત કરવામાં આવી છે, ત્યારે હુસૈને વળતો પ્રહાર કરતા કહ્યું કે, "કોર્ટ ત્યાં સો વર્ષથી છે, તેમાં કંઈ નવું નથી." આ આડકતરી લડાઈ હવે પક્ષના આંતરિક જૂથવાદને સપાટી પર લાવી રહી છે.
પક્ષમાં શિસ્તભંગની લટકતી તલવાર
ઇકબાલ હુસૈનના આ બળવાખોર તેવર સામે કોંગ્રેસના અન્ય નેતાઓએ આકરું વલણ અપનાવ્યું છે. ગૃહમંત્રી જી. પરમેશ્વરે સંકેત આપ્યો છે કે આવા નિવેદનોને કારણે આગામી ચૂંટણીમાં હુસૈનની ટિકિટ કપાઈ શકે છે. પરિવહન મંત્રી રામલિંગા રેડ્ડીએ પણ શિસ્તનો પાઠ ભણાવતા કહ્યું કે, પક્ષની વાતો ચાર દીવાલોની વચ્ચે થવી જોઈએ, જાહેર પ્લેટફોર્મ પર નહીં. સાગરના ધારાસભ્ય બેલુર ગોપાલકૃષ્ણએ તો હુસૈનને પક્ષમાંથી હાંકી કાઢવાની સીધી માંગ કરી છે.
કર્ણાટક રાજકારણમાં આવેલો આ નવો વળાંક આગામી દિવસોમાં સિદ્ધારમૈયા અને શિવકુમાર વચ્ચેના સત્તા સંતુલન પર કેવી અસર કરશે તે જોવું રસપ્રદ રહેશે.