તેહરાન: પશ્ચિમ એશિયામાં યુદ્ધની જ્વાળાઓ વધુ પ્રજ્વલિત થઈ રહી છે, જેમાં હવે ઈઝરાયેલે ઈરાનના મહત્વના ગણાતા તબરીઝ શહેર પર મોટો હુમલો કર્યો હોવાના અહેવાલો પ્રાપ્ત થયા છે. ઈરાની ન્યૂઝ એજન્સી મીઝાનના રિપોર્ટ અનુસાર, આજે શનિવારે વહેલી સવારે ઈઝરાયેલ દ્વારા તબરીઝના વિવિધ વિસ્તારોમાં આક્રમણ કરવામાં આવ્યું હતું, જેમાં લશ્કરી અને ઔદ્યોગિક માળખાને ભારે નુકસાન પહોંચ્યું છે.
તબરીઝ અને આખોલાના વિસ્તારોમાં વિનાશ
પૂર્વ અઝરબૈજાન પ્રાંતના આપત્તિ વ્યવસ્થાપન વિભાગ દ્વારા જાહેર કરવામાં આવેલી વિગતો મુજબ, પશ્ચિમ તબરીઝમાં આવેલા એક ખાનગી ક્ષેત્રના ઔદ્યોગિક એકમ પર હુમલો થયો છે. આ ઉપરાંત, આખોલા વિસ્તારમાં આવેલા એક ઉત્પાદન પ્લાન્ટ અને શહેરની આસપાસના અનેક લશ્કરી મથકોને ઈઝરાયેલે નિશાન બનાવ્યા હતા. આ શ્રેણીબદ્ધ હુમલાઓમાં ઓછામાં ઓછા પાંચ લોકો ઘાયલ થયા હોવાની પુષ્ટિ અધિકારીઓ દ્વારા કરવામાં આવી છે, જેમને સારવાર અર્થે હોસ્પિટલ ખસેડાયા છે.
ઈઝરાયેલ સેનાની પૂર્વ ચેતવણી
મહત્વની બાબત એ છે કે, હુમલો કરતા પહેલા ઈઝરાયેલની સેનાએ પશ્ચિમ તબરીઝના ઔદ્યોગિક વિસ્તારમાં હાજર લોકોને સુરક્ષિત સ્થળે ખસી જવા માટે કડક ચેતવણી આપી હતી. ઈઝરાયેલ દ્વારા સ્પષ્ટ કરવામાં આવ્યું હતું કે, આગામી કલાકોમાં તેઓ આ વિસ્તારમાં આવેલા ઈરાન સરકારના મહત્વના ઈન્ફ્રાસ્ટ્રક્ચર અને વ્યૂહાત્મક સ્થાનોને લક્ષ્ય બનાવશે. આ ચેતવણીના થોડા સમય બાદ જ મિસાઈલ અને હવાઈ હુમલા શરૂ કરી દેવામાં આવ્યા હતા.
તંગદિલીમાં ચરમસીમાએ વધારો
ઈરાનના સંરક્ષણ મથકો પર સીધા પ્રહારને કારણે બંને દેશો વચ્ચેની દુશ્મનાવટ હવે નવા સ્તરે પહોંચી છે. પૂર્વ અઝરબૈજાનના મેનેજમેન્ટ વિભાગે જણાવ્યું છે કે પ્રશાસન હાલમાં નુકસાનની સમીક્ષા કરી રહ્યું છે અને અસરગ્રસ્ત વિસ્તારોમાં રાહત કામગીરી હાથ ધરવામાં આવી છે. આ હુમલા બાદ સમગ્ર પૂર્વીય ઈરાનમાં હાઈ એલર્ટ જાહેર કરી દેવામાં આવ્યું છે. ઈઝરાયેલના આ પગલા બાદ ઈરાન તરફથી કેવો પ્રતિસાદ આપવામાં આવે છે તેના પર હવે આખા વિશ્વની નજર ટકેલી છે.