કોલકાતા : પશ્ચિમ બંગાળની રાજકીય રણભૂમિમાં વડાપ્રધાન નરેન્દ્ર મોદીએ રૌદ્ર સ્વરૂપ ધારણ કરી શાસક પક્ષ તૃણમૂલ કોંગ્રેસ પર આકરા પ્રહારો કર્યા હતા. કોલકાતાના ઐતિહાસિક બ્રિગેડ પરેડ ગ્રાઉન્ડમાં કેસરીયા મહેરામણને સંબોધતા પીએમ મોદીએ સ્પષ્ટ શબ્દોમાં ચેતવણી આપી હતી કે, 'નિર્દય સરકાર' ના અંતની ઉલટી ગણતરી શરૂ થઈ ગઈ છે. તેમણે આરોપ લગાવ્યો કે મમતા બેનર્જીની સરકારે ભાજપની આ રેલીને રોકવા માટે રસ્તાઓ બ્લોક કરવાથી લઈને પોસ્ટરો ફાડવા સુધીના તમામ નીચલા સ્તરના પ્રયાસો કર્યા છે, પરંતુ બંગાળની જનતામાં ફેલાયેલા પરિવર્તનના તોફાનને રોકવાની તાકાત હવે કોઈનામાં નથી.

પીએમ મોદીએ ભ્રષ્ટાચાર અને હિંસાના મુદ્દે ટીએમસીને ઘેરતા જણાવ્યું કે, જે બંગાળ ક્યારેક દેશને દિશા બતાવતું હતું, તે આજે 'જંગલરાજ' અને કટ-મનીની સંસ્કૃતિમાં ફસાઈ ગયું છે. તેમણે ભાવુક સ્વરે કહ્યું કે, બંગાળના યુવાનો આજે ડિગ્રી હોવા છતાં રોજગાર માટે અન્ય રાજ્યોમાં સ્થળાંતર કરવા મજબૂર છે કારણ કે અહીંની સરકાર માત્ર પોતાના ખિસ્સા ભરવામાં વ્યસ્ત છે. "આ લોકો ન તો પોતે કામ કરે છે, ન બીજાને કરવા દે છે," તેમ કહી મોદીએ કેન્દ્રની કલ્યાણકારી યોજનાઓમાં ટીએમસી દ્વારા નાખવામાં આવતા અવરોધો પર આકરા પ્રહારો કર્યા હતા.

ભાજપને 'મહિષાસુર મર્દિની' ના આશીર્વાદ હોવાનો ઉલ્લેખ કરી પીએમએ બંગાળના પુનર્નિર્માણનો સંકલ્પ દોહરાવ્યો હતો. તેમણે નેતાજી સુભાષચંદ્ર બોઝ અને સ્વામી વિવેકાનંદ જેવા મહાપુરુષોના સપનાનું બંગાળ બનાવવાનું વચન આપતા કહ્યું કે, જેઓએ કાયદો તોડ્યો છે અને જનતા પર અત્યાચાર કર્યો છે, તેમને વીણી-વીણીને જવાબદાર ઠેરવવામાં આવશે. આ રેલીએ બંગાળના રાજકારણમાં એક નવો વળાંક લાવી દીધો છે, જ્યાં પીએમ મોદીએ સીધો પડકાર ફેંકી દીધો છે કે પરિવર્તનની આ લહેર હવે ટૂંક સમયમાં જ રાજ્યમાં કાયદાનું શાસન સ્થાપિત કરશે.