નવી દિલ્હી: પશ્ચિમ એશિયા (મિડલ ઈસ્ટ) માં સતત વધી રહેલા ભૌગોલિક અને રાજકીય તણાવની સીધી અસર હવે આંતરરાષ્ટ્રીય વિમાન સેવાઓ પર જોવા મળી રહી છે. સુરક્ષાના કારણોસર એર કેનેડાએ મોટો નિર્ણય લેતા ટોરોન્ટોથી દુબઈ જતી તેની તમામ ફ્લાઇટ્સ આગામી ૧ મે સુધી સ્થગિત કરી દીધી છે. એરલાઇન્સે સ્પષ્ટ કર્યું છે કે જ્યાં સુધી આકાશમાં સુરક્ષિત માર્ગની ખાતરી ન મળે ત્યાં સુધી આ સેવાઓ બંધ રહેશે.
પરંતુ, આ સંકટ વચ્ચે ભારતીય મુસાફરો માટે એક આશાનું કિરણ પણ દેખાયું છે. એર કેનેડાએ જણાવ્યું છે કે દુબઈના વિકલ્પ તરીકે તેઓ ભારત પર વધુ ધ્યાન કેન્દ્રિત કરી રહ્યા છે. કેનેડા જવા માંગતા મુસાફરોને સુવિધા આપવા માટે એરલાઇન દિલ્હી રૂટ પર પોતાની ક્ષમતા અને ફ્લાઇટ્સની સંખ્યામાં સતત વધારો કરી રહી છે. આનાથી ભારત હવે આંતરરાષ્ટ્રીય પ્રવાસીઓ માટે એક મહત્વનું કનેક્ટિંગ હબ બની જશે.
બીજી તરફ, ભારતની એર ઇન્ડિયા અને એર ઇન્ડિયા એક્સપ્રેસ આ મુશ્કેલ સમયમાં પણ પોતાની સેવાઓ કાર્યરત રાખી રહી છે. ૧૪ માર્ચના રોજ આ બંને એરલાઇન્સ પશ્ચિમ એશિયાના દેશો માટે કુલ ૮૦ ફ્લાઇટ્સનું સંચાલન કરશે. જેમાં જેદ્દાહ અને મસ્કત જેવા શહેરોનો સમાવેશ થાય છે. દિલ્હી, મુંબઈ, કોચી અને મેંગલુરુ જેવા ભારતીય શહેરોથી વિશેષ ફ્લાઇટ્સ દ્વારા મુસાફરોને તેમના ગંતવ્ય સ્થાન સુધી પહોંચાડવામાં આવશે.
નોંધનીય છે કે ઇરાન અને અન્ય દેશો વચ્ચેના સંઘર્ષને કારણે હવાઈ ક્ષેત્ર અસુરક્ષિત બન્યું છે, જેના કારણે હોર્મુઝ સ્ટ્રેટ જેવા મહત્વના વિસ્તારોમાં પણ પરિવહનને માઠી અસર પહોંચી છે. કતાર જેવા દેશોમાં ફસાયેલા ભારતીયોને પરત લાવવા માટે પણ વિશેષ વ્યવસ્થાઓ કરવામાં આવી રહી છે. હાલની સ્થિતિને જોતા આગામી દિવસોમાં આંતરરાષ્ટ્રીય હવાઈ ભાડામાં પણ ફેરફાર થવાની શક્યતા સેવાઈ રહી છે.