મુંબઈ : મુંબઈગરાઓ માટે આજનો દિવસ ખુશીઓની સવારી લઈને આવ્યો છે. બોરીવલી સ્થિત સંજય ગાંધી રાષ્ટ્રીય ઉદ્યાન (SGNP) ની શાન ગણાતી અને લાખો બાળકોના બાળપણની યાદો સાથે જોડાયેલી 'વાન રાની' ટોય ટ્રેન ફરી એકવાર પાટા પર દોડતી થઈ છે. કેન્દ્રીય મંત્રી પીયૂષ ગોયલે આજે આ નવીનીકૃત અને આધુનિક બેટરી સંચાલિત ટ્રેનનું ઉદ્ઘાટન કર્યું હતું. આ પ્રસંગે તેમણે પોતે બાળકો અને પ્રવાસીઓ સાથે ટ્રેનમાં બેસીને જંગલની સફર માણી હતી.
૨૦૨૧માં તૌકતે વાવાઝોડાને કારણે ટ્રેક અને માળખાગત સુવિધાઓને ભારે નુકસાન થતા આ ટ્રેન બંધ કરવામાં આવી હતી. હવે આ ટ્રેન સંપૂર્ણપણે નવા અને પર્યાવરણને અનુકૂળ અવતારમાં પરત ફરી છે. પીયૂષ ગોયલે આ ક્ષણને ઉત્તર મુંબઈ માટે 'વાહ ક્ષણ' ગણાવી હતી.
નવી 'વાન રાની' ની ખાસિયતો:
•    બેટરી સંચાલિત: આ ટ્રેન પ્રદૂષણ રહિત છે, જે જંગલના શાંત વાતાવરણ અને વન્યજીવો માટે આશીર્વાદરૂપ સાબિત થશે.
•    વિસ્ટાડોમ કોચ: ટ્રેનમાં ચારે બાજુ કાચથી સજ્જ વિસ્ટાડોમ કોચ છે, જેનાથી પ્રવાસીઓ જંગલની હરિયાળી, પશુ-પંખીઓ અને તળાવના અદભુત દ્રશ્યો માણી શકશે.
•    ક્ષમતા: ટ્રેનમાં કુલ ચાર કોચ છે અને એકસાથે ૮૦ મુસાફરો મુસાફરી કરી શકશે.
•    રૂટ: આ સફર કૃષ્ણગિરી સ્ટેશનથી શરૂ થઈ ત્રિમૂર્તિ સ્ટેશન પર વિરામ લેશે અને ફરી મૂળ સ્થાને પરત ફરશે.
પ્રવાસનનું નવું સરનામું
પીયૂષ ગોયલે વિશ્વાસ વ્યક્ત કર્યો હતો કે આ ઉદ્યાન આગામી સમયમાં દેશના સૌથી સુંદર રાષ્ટ્રીય ઉદ્યાનોમાંનું એક બનશે. તેમણે કહ્યું, "અહીં સિંહ, વાઘ અને સમૃદ્ધ વનસ્પતિ છે. આ ટોય ટ્રેન બાળકોમાં ફરીથી એ જ જૂનો રોમાંચ જગાવશે." મંત્રીએ અધિકારીઓને સૂચના આપી છે કે કોઈપણ વિધિવત સમયપત્રકની રાહ જોયા વગર આજથી જ બાળકો અને પરિવારો માટે આ ટ્રેન ખુલ્લી મૂકી દેવામાં આવે.
જો તમે પણ મુંબઈમાં હોવ, તો આ વીકેન્ડ પર 'વાન રાની'ની સવારી કરવાનું ચૂકતા નહીં!