રાજકોટ : પશ્ચિમ એશિયામાં ઈરાન, ઈઝરાયેલ અને અમેરિકા વચ્ચે ચાલી રહેલા ભીષણ લશ્કરી સંઘર્ષની સીધી અસર હવે સામાન્ય ભારતીય મુસાફરોના ખિસ્સા પર પડવા લાગી છે. યુદ્ધના કારણે આંતરરાષ્ટ્રીય બજારમાં ક્રૂડ તેલ અને એવિએશન ટર્બાઇન ફ્યુઅલ (ATF) ના ભાવમાં લાગેલી આગને પગલે ભારતની નવી એરલાઇન અકાસા એર (Akasa Air) એ પણ ભાડામાં વધારો કરવાની જાહેરાત કરી છે. આગામી ૧૫ માર્ચથી અકાસા એરના તમામ નવા બુકિંગ પર ફ્યુઅલ સરચાર્જ લાગુ કરવામાં આવશે.

અકાસા એરના નવા દરો અને નિયમો

અકાસા એરના પ્રવક્તાએ જણાવ્યું હતું કે ભૌગોલિક રાજકીય તણાવને કારણે ઈંધણના ભાવમાં નોંધપાત્ર વધારો થયો છે, જેને પગલે કંપની પાસે સરચાર્જ લાદવા સિવાય કોઈ વિકલ્પ રહ્યો નથી.

• વધારો: સ્થાનિક અને આંતરરાષ્ટ્રીય રૂટ પર ફ્લાઇટના સમયગાળા મુજબ ₹૧૯૯ થી ₹૧,૩૦૦ સુધીનો વધારાનો ચાર્જ વસૂલવામાં આવશે.
• સમયમર્યાદા: આ વધારો ૧૫ માર્ચ, ૨૦૨૬ ના રોજ મધ્યરાત્રિ પછી થનારા બુકિંગ પર જ લાગુ થશે. અગાઉ કરેલા બુકિંગ પર તેની કોઈ અસર થશે નહીં.

ઇન્ડિગો અને એર ઇન્ડિયા પણ હરીફાઈમાં

માત્ર અકાસા જ નહીં, પણ દેશની સૌથી મોટી એરલાઇન ઇન્ડિગો એ પણ ૧૪ માર્ચથી જ ઇંધણ ચાર્જ લેવાનું શરૂ કરી દીધું છે. ઇન્ડિગોમાં સ્થાનિક રૂટ માટે ₹૪૨૫ અને યુરોપ જેવા લાંબા રૂટ માટે ₹૨,૩૦૦ સુધીનો વધારો કરવામાં આવ્યો છે. બીજી તરફ, એર ઇન્ડિયા એ પણ ઉત્તર અમેરિકા અને ઓસ્ટ્રેલિયા જેવા લાંબા અંતરના રૂટ પર $૨૦૦ (આશરે ₹૧૬,૫૦૦) સુધીનો સરચાર્જ ઝીંકી દીધો છે.

કેમ વધી રહ્યા છે ભાવ?

૨૮ ફેબ્રુઆરીથી મધ્ય-પૂર્વમાં શરૂ થયેલા સંઘર્ષ બાદ જેટ ઇંધણના ભાવ લગભગ બમણા થઈ ગયા છે. આ ઉપરાંત, સુરક્ષાના કારણોસર ઘણી એરલાઇન્સે પશ્ચિમ એશિયાના હવાઈ ક્ષેત્ર (Airspace) નો ઉપયોગ કરવાનું ટાળ્યું છે. આના પરિણામે ફ્લાઇટ્સે લાંબા અને વૈકલ્પિક રૂટ પરથી પસાર થવું પડે છે, જેનાથી ઈંધણનો વપરાશ અને ઓપરેટિંગ ખર્ચ ૪૦% જેટલો વધી ગયો છે.

સ્પાઇસજેટના સ્થાપક અજય સિંહે સરકારને વિનંતી કરી છે કે જેટ ઇંધણ પરની એક્સાઇઝ ડ્યુટી અને વેટમાં ઘટાડો કરવામાં આવે, જેથી સામાન્ય જનતાને આ મોંઘવારીમાંથી થોડી રાહત મળી શકે.