રિયાધ:મધ્ય પૂર્વમાં ચાલી રહેલો સંઘર્ષ હવે ખતરનાક વળાંક લઈ રહ્યો છે, જેમાં ઈરાન અને ઈઝરાયેલ વચ્ચેના યુદ્ધની અસરો હવે સાઉદી અરેબિયા અને સંયુક્ત આરબ અમીરાત (UAE) સુધી પહોંચી છે. રવિવારે સાઉદી સંરક્ષણ મંત્રાલયે સત્તાવાર જાહેરાત કરી હતી કે રિયાધના મેટ્રોપોલિટન વિસ્તારને નિશાન બનાવીને મોકલવામાં આવેલા ચાર ડ્રોનને હવામાં જ આંતરીને નષ્ટ કરવામાં આવ્યા છે. સાઉદી સુરક્ષા દળોએ સમગ્ર દિવસ દરમિયાન રાજધાની અને પૂર્વીય વિસ્તારોમાં કુલ ૧૦ ડ્રોન તોડી પાડીને મોટો હુમલો નિષ્ફળ બનાવ્યો છે. આ ઉપરાંત ઉત્તરી સાઉદીના અલ-જૌફ પ્રદેશમાં પણ ડ્રોન હુમલાના પ્રયાસોને નિષ્ફળ બનાવવામાં આવ્યા હોવાના અહેવાલો છે.
બીજી તરફ, લેબેનોનમાં સ્થિતિ અત્યંત ગંભીર બની છે. ઈઝરાયેલી સૈન્યએ બેરૂતમાં હિઝબુલ્લાહના ચુનંદા 'રદવાન ફોર્સ'ના કમાન્ડ સેન્ટરો અને દક્ષિણ લેબેનોનમાં લોન્ચ સાઇટ્સ પર વિનાશક હુમલા કર્યા છે. ૨૮ ફેબ્રુઆરીથી શરૂ થયેલા અમેરિકા-ઈઝરાયેલના સંયુક્ત ઓપરેશન બાદ લેબેનોનમાં અત્યાર સુધીમાં ૮૨૬ લોકોના મોત નીપજ્યા છે. લેબેનોને ઈઝરાયેલ સાથે સીધી શાંતિ વાટાઘાટો માટે તૈયારી બતાવી છે, પરંતુ તે પહેલાં યુદ્ધવિરામની શરત મૂકી છે. આગામી દિવસોમાં પેરિસ અથવા સાયપ્રસમાં આ અંગે વાટાઘાટો શરૂ થઈ શકે છે, જેમાં અમેરિકા તરફથી રોન ડર્મર અને જેરેડ કુશ્નર પ્રતિનિધિત્વ કરે તેવી શક્યતા છે.
અખાતી દેશોમાં સૌથી મોટો ખતરો ત્યારે ઊભો થયો જ્યારે ઈરાને યુએઈને તેના ત્રણ મુખ્ય બંદરો ખાલી કરવા માટે ગંભીર ચેતવણી આપી. ઈરાને આરોપ લગાવ્યો છે કે અમેરિકાએ તેના ખાર્ગ ટાપુ પરના ઓઈલ ટર્મિનલ પર હુમલો કરવા માટે યુએઈના બંદરો અને ગોદીઓનો ઉપયોગ કર્યો છે. જોકે, આ દાવા માટે તેહરાને કોઈ પુરાવા રજૂ કર્યા નથી. આ ધમકીના જવાબમાં અમેરિકાના રાષ્ટ્રપતિ ડોનાલ્ડ ટ્રમ્પે વ્યૂહાત્મક રીતે મહત્વપૂર્ણ એવી હોર્મુઝની સામુદ્રધુનીને સુરક્ષિત રાખવા માટે સાથી દેશોને યુદ્ધ જહાજો તૈનાત કરવા અપીલ કરી છે.
દક્ષિણ કોરિયાએ ટ્રમ્પના આ નિવેદન બાદ સાવચેતીભર્યું વલણ અપનાવ્યું છે. દક્ષિણ કોરિયાના રાષ્ટ્રપતિ કાર્યાલયના અધિકારીએ જણાવ્યું છે કે તેઓ સોશિયલ મીડિયા પર ટ્રમ્પની ટિપ્પણીઓનું નજીકથી નિરીક્ષણ કરી રહ્યા છે અને અમેરિકા સાથે પરામર્શ કર્યા બાદ હોર્મુઝમાં જહાજો મોકલવા અંગે નિર્ણય લેશે. યુદ્ધની આ આગમાં હવે વૈશ્વિક સત્તાઓ અને પાડોશી દેશો પણ સીધા લપેટાઈ રહ્યા હોય તેવું સ્પષ્ટ દેખાઈ રહ્યું છે, જેના કારણે વિશ્વભરમાં કાચા તેલના પુરવઠા અને દરિયાઈ વેપાર પર સંકટના વાદળો છવાયા છે.