અમૃતસર: અમૃતસર કમિશનરેટ પોલીસે દેશવિરોધી પ્રવૃત્તિઓ કરતા એક મોટા ડ્રગ્સ અને હથિયારના નેટવર્કનો પર્દાફાશ કર્યો છે. રવિવારે વહેલી સવારે પોલીસે એક આધુનિક ઓપરેશન હાથ ધરીને પાકિસ્તાની તસ્કરો સાથે જોડાયેલા 6 કુખ્યાત ગુનેગારોને ઝડપી પાડ્યા છે. આ ટોળકી પાસેથી 3.5 કિલો હેરોઈન અને 5 અત્યાધુનિક વિદેશી પિસ્તોલનો જથ્થો જપ્ત કરવામાં આવ્યો છે, જે સુરક્ષા એજન્સીઓ માટે મોટી સફળતા માનવામાં આવે છે. સીપી ગુરપ્રીત સિંહ ભુલ્લરે જણાવ્યું હતું કે, પકડાયેલા આરોપીઓ સામે એનડીપીએસ (NDPS) એક્ટ અને આર્મ્સ એક્ટ હેઠળ કડક ગુનો નોંધી વધુ તપાસ હાથ ધરવામાં આવી છે.

સીપી ગુરપ્રીત સિંહ ભુલ્લરે ધરપકડ કરાયેલા આરોપીઓની ઓળખ કરણ સિંહ, ગુરપ્રીત સિંહ ઉર્ફે ગોપી, રાકેશ ઉર્ફે કેશુ, ચમકૌર સિંહ, મખ્ખનદીપ સિંહ ઉર્ફે મખ્ખન અને સિંગા ઉર્ફે બીરા તરીકે કરી છે. આ આરોપીઓ મુખ્યત્વે તરનતારન અને અમૃતસર ગ્રામ્ય વિસ્તારના રહેવાસી છે. પોલીસને ગુપ્ત બાતમી મળી હતી કે આ ગેંગ શહેરના વિવિધ વિસ્તારોમાં ડ્રગ્સ અને હથિયારો પહોંચાડવા માટે સક્રિય છે. આ ઈનપુટને આધારે પોલીસે વોચ ગોઠવી હતી અને તમામ છ આરોપીઓને ગેરકાયદેસર શસ્ત્રો અને નશીલા પદાર્થોની હેરફેર કરતા રંગેહાથ દબોચી લીધા હતા.

તપાસમાં એક અત્યંત ચોંકાવનારી વિગત સામે આવી છે કે, આ હેરોઈન અને હથિયારોની ખેપ થોડા દિવસો પહેલા જ પાકિસ્તાની તસ્કરો દ્વારા ડ્રોન મારફતે ભારતીય સીમામાં ફેંકવામાં આવી હતી. આ આધુનિક નેટવર્ક ડ્રોન ટેકનોલોજીનો ઉપયોગ કરીને સીધું સરહદ પારથી માલ મંગાવતું હતું, જેથી સુરક્ષા એજન્સીઓની નજરથી બચી શકાય. ડ્રોન દ્વારા સરહદ પર ફેંકવામાં આવેલી આ સામગ્રીને આ આરોપીઓ સુરક્ષિત સ્થાને પહોંચાડવાની ફિરાકમાં હતા, પરંતુ પોલીસની સતર્કતાને કારણે તેમના નાપાક મનસૂબા સફળ થયા નહીં.

અમૃતસર પોલીસની આ કાર્યવાહીથી સરહદ પારથી ચાલતી ડ્રગ્સ અને હથિયારની તસ્કરી પર મોટો ફટકો પડ્યો છે. પકડાયેલા આરોપીઓની પૂછપરછમાં હવે એ વાત પર ધ્યાન કેન્દ્રિત કરવામાં આવી રહ્યું છે કે આ જથ્થો અંતિમ રીતે કોને સપ્લાય કરવાનો હતો અને તેમના અન્ય સાગરિતો કોણ છે. પોલીસના જણાવ્યા અનુસાર, આ તપાસમાં મોટા ખુલાસા થવાની શક્યતા છે. કમિશનરેટ પોલીસ હવે આ નેટવર્કના મૂળ સુધી પહોંચીને સરહદી વિસ્તારોમાં થતી આવી ગતિવિધિઓને ડામવા માટે વ્યાપક અભિયાન ચલાવી રહી છે.