હોર્મુઝ સંકટમાં સાથી દેશોએ અમેરિકાનો સાથ છોડ્યો : જાપાન-ઓસ્ટ્રેલિયાનો યુદ્ધ જહાજો મોકલવાનો સ્પષ્ટ ઇનકાર
ટ્રમ્પનો ‘માસ્ટર પ્લાન' નિષ્ફળ? : ઈરાન સામેના જંગમાં અમેરિકા એકલું પડ્યું : ફ્રાન્સ અને જર્મનીએ પણ હાથ ઊંચા કરી દીધા
દિલ્હી, તા.૧૬: હોર્મુઝની સામુદ્રધુનીમાં વધી રહેલા તણાવ વચ્ચે અમેરિકી રાષ્ટ્રપતિ ડોનાલ્ડ ટ્રમ્પને આંતરરાષ્ટ્રીય સ્તરે મોટો રાજદ્વારી ફટકો પડ્યો છે. ઈરાન સામે મોરચો માંડવા માટે ટ્રમ્પે જે સાથી દેશો પાસે મદદ માંગી હતી, તેમણે એકપછી એક પીછેહઠ કરી લીધી છે. ખાસ કરીને એશિયામાં અમેરિકાના મજબૂત સાથી ગણાતા જાપાન અને ઓસ્ટ્રેલિયાએ પોતાના યુદ્ધ જહાજો આ સંવેદનશીલ વિસ્તારમાં મોકલવાની ટ્રમ્પની વિનંતીને સ્પષ્ટપણે ફગાવી દીધી છે. ટ્રમ્પનું માનવું હતું કે જે દેશો આ માર્ગ પરથી તેલ મેળવે છે તેમણે તેની સુરક્ષાની જવાબદારી ઉઠાવવી જોઈએ, પરંતુ સાથી દેશો અત્યારે અમેરિકા અને ઈરાન વચ્ચેના સીધા સંઘર્ષમાં હોમાવા તૈયાર નથી.
યુરોપિયન દેશોએ પણ આ મામલે અમેરિકાને જોરદાર આંચકો આપ્યો છે. ફ્રાન્સના સંરક્ષણ મંત્રીએ કડક શબ્દોમાં જણાવ્યું છે કે જ્યાં સુધી આ વિસ્તારમાં યુદ્ધની સ્થિતિ છે, ત્યાં સુધી તેઓ પોતાના સૈનિકો કે જહાજો જોખમમાં મૂકશે નહીં. જર્મની અને તુર્કીએ પણ આ સૈન્ય અભિયાનમાં ભાગ લેવાનો ઈનકાર કરી દીધો છે, જેનાથી ટ્રમ્પની વ્યૂહરચનાના પાયા હચમચી ગયા છે. જોકે, ટ્રમ્પે હંમેશની જેમ આક્રમક અંદાજમાં કહ્યું છે કે સાથી દેશો મદદ ન કરે તો પણ તેમને કોઈ ફર્ક પડતો નથી, કારણ કે અમેરિકાએ ઈરાનની મિસાઈલ અને ડ્રોન ક્ષમતાને પહેલાથી જ ૮૦ ટકા જેટલી તોડી પાડી છે.હોર્મુઝની આ કટોકટી માત્ર સૈન્ય મુદ્દો નથી, પરંતુ તે વૈશ્વિક અર્થતંત્રની જીવાદોરી સમાન છે. વિશ્વના કુલ તેલ વપરાશનો ૨૦ ટકા હિસ્સો અને વિશાળ માત્રામાં LNG ગેસ આ સાંકડા દરિયાઈ માર્ગેથી પસાર થાય છે. જો ચીન, ભારત અને દક્ષિણ કોરિયા જેવા દેશો માટે આ માર્ગ અસુરક્ષિત બનશે, તો આંતરરાષ્ટ્રીય બજારમાં ઇંધણના ભાવ આસમાને પહોંચી શકે છે. હાલમાં દક્ષિણ કોરિયા આ મુદ્દે વિચારણા કરી રહ્યું છે, પરંતુ જો અન્ય મોટા દેશો સત્તાવાર સહયોગ નહીં આપે, તો અમેરિકા માટે આ મોરચે એકલા હાથે લડવું આર્થિક અને સૈન્ય રીતે અત્યંત પડકારજનક સાબિત થશે.
(2:59 PM IST)
છેલ્લા 8 દિવસમાં સૌથી લોકપ્રિય 
