નવી દિલ્‍હી તા.૧૬: ઇન્‍ડિયન ઓઇલની LPG બુકિંગ એપ IndianOil ONEએ ગૂગલ પ્‍લેસ્‍ટોરના ટોચના ફ્રી ચાર્ટમાં ChatGPTને પાછળ છોડી દીધી છે અને હવે એ પ્રથમ સ્‍થાન ધરાવે છે. પ્‍લેસ્‍ટોર ચાર્ટ ડેટા દર્શાવે છે કે IndianOil ONE ટોચના સ્‍થાન પર છે જ્‍યારે ChatGPT બીજા સ્‍થાને છે.

મિડલ ઈસ્‍ટમાં યુદ્ધને કારણે LPG સપ્‍લાયની સમસ્‍યાઓ વચ્‍ચે આ જાણકારી સામે આવી છે. LPG ની અછત વચ્‍ચે સરકારે ગભરાટ વિના બુકિગ કરવાની વિનંતી કરી હતી અને ફક્‍ત ૧૩ માર્ચે ૮૮.૮ લાખ બુકિગની વિનંતી મળી હતી. LPG ગેસ સિલિન્‍ડરની ભારે ડિમાન્‍ડને કારણે લોકો LPG સપ્‍લાયર્સની એપ્‍સ ડાઉનલોડ કરી રહ્યા છે.

IndianOil ONE એપ દ્વારા કોઈ પણ વ્‍યક્‍તિ LPG સિલિન્‍ડર બુક કરી શકે છે, તેનો ઓર્ડર ટ્રેક કરી શકે છે અને તેના કનેક્‍શનનું સંચાલન કરી શકે છે. આ કારણે એ ગયા અઠવાડિયે ભારતમાં સૌથી વધુ ડાઉનલોડ થયેલી એપ્‍સમાંની એક બની ગઈ છે. આ એપ યુઝર્સને તેમના LPG અકાઉન્‍ટ્‍સને ડિજિટલ રીતે મેનેજ કરવાની મંજૂરી આપે છે, જેનાથી વિતરકોની મુલાકાત લેવાની અથવા ફોન-બુકિંગ કરવાની જરૂરિયાત ઓછી થાય છે. પુરવઠાની અછત છે ત્‍યારે યુઝર્સ બુકિગની સ્‍થિતિ અને ડિલિવરીની સમયરેખા પર આ એપ થકી નજર રાખે છે.

ગુગલ પ્‍લેસ્‍ટોર પર ટોચની મફત એપ્‍લિકેશનોની યાદીમાં IndianOil ONE ગઈ કાલે ટોચ પર છે. LPG બુકિગ એપે ChatGPT, મીશો, ફિલપકાર્ટ અને જિયોહોટસ્‍ટાર જેવી લોકપ્રિય એપ્‍લિકેશનોને પણ પાછળ છોડી દીધી છે. આ પરિવર્તન પ્રતિબિંબિત કરે છે કે જ્‍યારે રસોઈ બળતણ જેવી આવશ્‍યક સેવાઓ પુરવઠાના અવરોધોનો સામનો કરે છે ત્‍યારે ગ્રાહકની પ્રાથમિકતાઓ કેવી રીતે બદલાઈ શકે છે.

પેટ્રોલિયમ અને નેચરલ ગેસ મંત્રાલયે જણાવ્‍યું છે કે પાઇપ્‍ડ નેચરલ ગેસ (PNG)નું કનેક્‍શન ધરાવતા ગ્રાહકોને ઘરેલુ લિક્‍વિફાઇડ પેટ્રોલિયમ ગેસ (LPG)નું સિલિન્‍ડર મેળવવા અથવા કોઈ પણ સરકારી તેલ કંપની પાસેથી અથવા તેમના વિતરકો દ્વારા ઘરેલુ LPGસિલિન્‍ડર રીફિલિંગ કરવાથી પ્રતિબંધિત કર્યા છે. આવી વ્‍યક્‍તિઓએ તાત્‍કાલિક ઘરેલુ LPGકનેક્‍શન છોડી દેવાની જરૂર પડશે. ઈરાન સાથે અમેરિકા-ઇઝરાયલ યુદ્ધને કારણે ગેસપુરવઠો ખોરવાઈ ગયો હોવાથી LPGની ઉપલબ્‍ધતાની ચિંતાઓ વચ્‍ચે મંત્રાલયે આ નિર્ણય લીધો છે.