મુંબઈ : દેશની સંરક્ષણ પ્રણાલીના 'માસ્ટરમાઈન્ડ' ગણાતા DRDOના પૂર્વ ડાયરેક્ટર ડૉ. પ્રદીપ કુરુલકર પર પાકિસ્તાની હની-ટ્રેપમાં ફસાઈને રાષ્ટ્રીય સુરક્ષા સાથે સોદાબાજી કરવાનો સનસનીખેજ આરોપ છે. બોમ્બે હાઈકોર્ટે  તેમની જામીન અરજી પર લાંબી દલીલો સાંભળ્યા બાદ પોતાનો નિર્ણય અનામત રાખ્યો છે. એટીએસ  દ્વારા રજૂ કરવામાં આવેલા પુરાવાઓ મુજબ, કુરુલકર યુકેના નંબરથી ચેટ કરતી પાકિસ્તાની એજન્ટ 'ઝારા દાસગુપ્તા'ના મોહપાશમાં ફસાયા હતા અને વોટ્સએપ કોલ તેમજ વિડીયો કોલ દ્વારા અગ્નિ-૬ અને બ્રહ્મોસ જેવી ઘાતક મિસાઈલ સિસ્ટમની અત્યંત સંવેદનશીલ વિગતો દુશ્મન દેશ સુધી પહોંચાડી હતી.

અદાલતમાં સરકારી વકીલે દાવો કર્યો છે કે કુરુલકરે માત્ર માહિતી જ શેર નથી કરી, પરંતુ પાકિસ્તાની એજન્ટ દ્વારા મોકલવામાં આવેલી શંકાસ્પદ લિંક્સ અને APK ફાઈલો પણ ડાઉનલોડ કરી હતી, જેનાથી દેશના સંરક્ષણ સંશોધનોમાં મોટા ગાબડા પડવાની શક્યતા ઊભી થઈ છે. બીજી તરફ, બચાવ પક્ષના વકીલ અશોક મુંદરગીએ એવી દલીલ કરી હતી કે જે માહિતી શેર કરવામાં આવી છે તે પહેલેથી જ પબ્લિક ડોમેન કે ગૂગલ પર ઉપલબ્ધ હતી અને તેમના અસીલને ખોટી રીતે ફસાવવામાં આવ્યા છે. જોકે, તપાસ એજન્સીએ કોર્ટને જણાવ્યું હતું કે આરોપીએ વિદેશ પ્રવાસ દરમિયાન પણ શંકાસ્પદ સંપર્કો જાળવી રાખ્યા હતા.

હવે સમગ્ર દેશની નજર ૭ એપ્રિલ પર ટકેલી છે, જ્યારે હાઈકોર્ટ નક્કી કરશે કે આ હાઈ-પ્રોફાઈલ જાસૂસી કેસમાં આરોપીને જામીન મળશે કે જેલના સળિયા પાછળ જ રહેવું પડશે. ૨૦૨૩માં ધરપકડ થયા બાદ કુરુલકરના મોબાઈલ અને લેપટોપમાંથી મળેલા ફોરેન્સિક પુરાવાઓ આ કેસમાં પાયાના સાબિત થયા છે. જો આરોપો સાબિત થશે, તો તે ભારતીય સંરક્ષણ વિજ્ઞાનના ઈતિહાસમાં સૌથી મોટો વિશ્વાસઘાત ગણાશે. આ કેસ એ વાતની સાબિતી છે કે ટેકનોલોજીના યુગમાં દેશના રક્ષકોને ડિજિટલ હની-ટ્રેપ દ્વારા કેવી રીતે નિશાન બનાવવામાં આવી રહ્યા છે.