નવી દિલ્હી: હિન્દી સાહિત્ય જગતના જાણીતા લેખિકા મમતા કાલિયા માટે વર્ષ ૨૦૨૬ની શરૂઆત ખુશીની ભેટ લઈને આવી છે. વરિષ્ઠ વાર્તાકાર મમતા કાલિયાને તેમના સંસ્મરણ પુસ્તક 'જીતે જી અલ્હાબાદ' (Jeete Jee Allahabad) માટે વર્ષ ૨૦૨૫નો સાહિત્ય અકાદમી પુરસ્કાર આપવાની જાહેરાત કરવામાં આવી છે. સાહિત્ય અકાદમીએ બહાર પાડેલી યાદી મુજબ, દેશની ૨૪ ભાષાઓમાં ઉત્કૃષ્ટ સાહિત્યિક કૃતિઓ પૈકી મમતાજીના આ પુસ્તકને હિન્દી ભાષા માટે શ્રેષ્ઠ પસંદ કરવામાં આવ્યું છે.
અલ્હાબાદની સુગંધ અને સાહિત્યિક રંગ
મમતા કાલિયાનું આ પુસ્તક માત્ર એક સંસ્મરણ નથી, પણ અલ્હાબાદ (હવે પ્રયાગરાજ) શહેરનો એક જીવંત દસ્તાવેજ છે. આ પુસ્તકમાં લેખિકાએ અલ્હાબાદમાં વિતાવેલા પોતાના શરૂઆતના દિવસો, રાણી મંડીમાં આવેલું તેમનું ઘર, લોકનાથનો સ્વાદ અને ચોક વિસ્તારના જૂના શહેરના વર્ણનો અત્યંત સુંદર શૈલીમાં આલેખ્યા છે. આ પુસ્તક વાંચતા વાચક તે સમયના અલ્હાબાદ અને ત્યાંના લેખકોના વિશ્વમાં ખોવાઈ જાય છે.
પુસ્તકનો એક રોમાંચક કિસ્સો
આ પુસ્તકમાં લેખિકાએ તે સમયના લેખકો અને તેમના સ્વભાવ વિશે પણ રસપ્રદ વાતો લખી છે. એક કિસ્સો શેર કરતા તેઓ લખે છે કે, એક સેમિનાર દરમિયાન જ્યારે જાણીતા ન્યાયાધીશ માર્કંડેય કાત્જુએ પ્રેમચંદ વિશે કંઈક વિવાદાસ્પદ ટિપ્પણી કરી, ત્યારે પ્રખ્યાત સાહિત્યકાર ભૈરવ પ્રસાદ ગુપ્ત એટલા ગુસ્સે થયા કે કાત્જુ સાહેબે સ્ટેજ પરથી કૂદીને ભાગવું પડ્યું હતું! આવા અનેક અનકહ્યા કિસ્સાઓ આ પુસ્તકને ખાસ બનાવે છે.
લેખિકાની ભાવુક પ્રતિક્રિયા
પુરસ્કારની જાહેરાત થતા જ મમતા કાલિયાના ફોન પર અભિનંદનનો ધોધ વછૂટ્યો હતો. તેમણે ફેસબુક પર પોતાની લાગણી વ્યક્ત કરતા લખ્યું, "મિત્રો, તમારા પ્રેમ અને આશીર્વાદ માટે આભાર. આ સન્માન મને મારું આગામી પુસ્તક લખવા માટે નવી પ્રેરણા આપે છે."
સન્માન સમારોહ
સાહિત્ય અકાદમી દ્વારા આગામી ૩૧ માર્ચ, ૨૦૨૬ના રોજ નવી દિલ્હીમાં એક ભવ્ય સમારોહ યોજવામાં આવશે. જેમાં મમતા કાલિયાને એક લાખ રૂપિયાની રોકડ રકમ, શાલ અને સ્મૃતિ ચિહ્ન તરીકે તાંબાની તકતી એનાયત કરવામાં આવશે. આ જાહેરાત બાદ સાહિત્ય જગતમાં ખુશીની લહેર જોવા મળી રહી છે.