બેંગલુરુ : સોશિયલ મીડિયા પર અવારનવાર વિચિત્ર બિલો વાયરલ થતા હોય છે, પરંતુ આ વખતે જે કિસ્સો સામે આવ્યો છે તેણે નેટીઝન્સને માથું ખંજવાળવા પર મજબૂર કરી દીધા છે. બેંગલુરુના એક પ્રખ્યાત કાફેમાં જ્યારે એક ગ્રાહકે બે ગ્લાસ લીંબુ પાણી મંગાવ્યા, ત્યારે બિલ જોઈને તેના હોશ ઉડી ગયા હતા. રેસ્ટોરન્ટે માત્ર લીંબુ પાણીની ઊંચી કિંમત જ નહીં, પણ તેની ઉપર 'ગેસ કટોકટી ચાર્જ' (Gas Crisis Charge) નામે વધારાના પૈસા વસૂલ્યા હતા.
લીંબુ પાણી અને ગેસનો શું સંબંધ?
વાયરલ થઈ રહેલા આ બિલમાં બે લીંબુ શરબતની કિંમત ₹૩૫૮ દર્શાવવામાં આવી છે. આશ્ચર્યની વાત એ છે કે, રેસ્ટોરન્ટે આ બિલ પર ૫ ટકાના દરે આશરે ₹૧૭ 'ગેસ કટોકટી ચાર્જ' તરીકે ઉમેર્યા છે. અત્યારે દેશભરમાં ગેસ સિલિન્ડર મેળવવા માટે લાંબી લાઈનો લાગી રહી છે, જેનો ફાયદો ઉઠાવીને રેસ્ટોરન્ટ માલિકો ગ્રાહકો પર મનસ્વી ટેક્સ લાદી રહ્યા છે. પરંતુ લીંબુ પાણી જેવી ઠંડી પીણીમાં, જેમાં ગેસનો કોઈ જ ઉપયોગ થતો નથી, તેના પર આવો ચાર્જ વસૂલવો એ ચર્ચાનો વિષય બન્યો છે.
નેટીઝન્સની રમુજી પ્રતિક્રિયાઓ
એક્સ (X) પર આ બિલનો ફોટો વાયરલ થતા જ લોકોએ રેસ્ટોરન્ટની મજાક ઉડાવવાનું શરૂ કરી દીધું છે. એક યુઝરે રમૂજમાં પૂછ્યું, "શું આ લોકોએ લીંબુ પાણીને ગેસ પર ઉકાળીને બનાવ્યું છે કે શું?" જ્યારે બીજા એક યુઝરે લખ્યું કે, "લાગે છે કે રેસ્ટોરન્ટ માલિક પર હજુ હોળીનો નશો ઉતર્યો નથી, એટલે ગમે તેમ ચાર્જ વસૂલી રહ્યા છે." દિલ્હી અને મુંબઈ જેવા મોટા શહેરોમાં પણ આ પ્રકારના છૂપા ચાર્જ વસૂલાતા હોવાની ફરિયાદો ઉઠી રહી છે.
ગ્રાહકોમાં વધતો રોષ
વધતી જતી મોંઘવારી વચ્ચે રેસ્ટોરન્ટ્સ દ્વારા કરવામાં આવતી આવી મનમાનીથી ગ્રાહકોમાં ભારે રોષ જોવા મળી રહ્યો છે. ગેસની અછત ચોક્કસપણે એક ગંભીર સમસ્યા છે, પરંતુ જે વસ્તુ બનાવવામાં ગેસનો વપરાશ જ નથી થતો, તેની પર ચાર્જ લેવો એ લૂંટ સમાન હોવાનું લોકો માની રહ્યા છે. આ ફોટો લાખો લોકો જોઈ ચૂક્યા છે અને ગ્રાહક સુરક્ષાના નિયમોને લઈને ફરી ચર્ચા જાગી છે.