રાજકોટ : હાલના દિવસોમાં એલપીજી (LPG) સિલિન્ડરની અછતને કારણે લોકો રસોઈ માટે ઇન્ડક્શન કુકટોપનો સહારો લઈ રહ્યા છે. ગેસ કરતાં વાપરવામાં સરળ અને ઝડપી હોવા છતાં, ઇન્ડક્શન સ્ટવ એક સંવેદનશીલ ઇલેક્ટ્રોનિક ઉપકરણ છે. જો તેના ઉપયોગમાં બેદરકારી રાખવામાં આવે, તો તે માત્ર ઉપકરણને જ નહીં પણ તમને આર્થિક નુકસાન અને શારીરિક ઈજા પણ પહોંચાડી શકે છે. કેટલીક મહત્વની ટિપ્સ દરેક યુઝરે જાણવી જોઈએ.
ગમે તે વાસણ નહીં ચાલે
ગેસ સ્ટવની જેમ ઇન્ડક્શન પર તમે કોઈપણ વાસણ મૂકી શકતા નથી. ઇન્ડક્શન માત્ર મેગ્નેટિક બેઝ ધરાવતા લોખંડ કે સ્ટેનલેસ સ્ટીલના વાસણો પર જ કામ કરે છે. જો તમે તેના પર એલ્યુમિનિયમ, તાંબુ, કાચ કે સિરામિકના વાસણો વાપરશો, તો તે ગરમ થશે નહીં અને સ્ટોવની સર્કિટ પર દબાણ વધશે.
ધાતુની વસ્તુઓથી રહો દૂર
ઇન્ડક્શનની ઉપરની સપાટી પર રસોઈ કરતી વખતે ક્યારેય છરી, ચમચી કે એલ્યુમિનિયમ ફોઈલ જેવી વસ્તુઓ ન મૂકવી જોઈએ. ઇન્ડક્શનના ચુંબકીય ક્ષેત્રને કારણે આ વસ્તુઓ પણ અત્યંત ગરમ થઈ શકે છે, જે અજાણતા અડવાથી તમારા હાથને ગંભીર રીતે બાળી શકે છે.
વેન્ટિલેશન અને હવાની અવરજવર
દરેક ઇન્ડક્શન સ્ટોવની પાછળ અથવા નીચેના ભાગમાં હવાના સેવન અને નિકાલ માટે વેન્ટ્સ (કાણાં) આપેલા હોય છે. જો તમે સ્ટોવને એવી જગ્યાએ મૂકો જ્યાં આ વેન્ટ્સ અવરોધાય, તો મશીન અંદરથી ઓવરહીટ થઈ જશે. સતત ગરમી વધવાથી અંદરના સેન્સર અને કોઈલ બળી જવાનું જોખમ રહે છે.
તૂટેલી કાચની સપાટી એટલે ખતરો
જો તમારા ઇન્ડક્શનની ઉપરની કાચની સપાટીમાં સહેજ પણ તિરાડ પડી હોય, તો તેનો ઉપયોગ તુરંત બંધ કરી દેવો જોઈએ. તિરાડમાંથી પાણી કે તેલ જેવા પ્રવાહી અંદર ઉતરી શકે છે, જેનાથી આંતરિક શોર્ટ-સર્કિટ થઈ શકે છે અને યુઝરને જોરદાર ઇલેક્ટ્રિક શોક લાગવાની શક્યતા વધી જાય છે.
સફાઈ અને જાળવણી
ઇન્ડક્શનને હંમેશા સૂકા અને નરમ કપડાથી સાફ કરો. સફાઈ કરતા પહેલા પાવર પ્લગ કાઢી નાખવો હિતાવહ છે. રસોઈ કરતી વખતે વાસણોને કાચ પર ઘસવા કે સરકાવવા નહીં, કારણ કે તેનાથી કાચ પર સ્ક્રેચ પડી શકે છે અને તેની ક્ષમતા ઘટી શકે છે.