કેન્ટરબરી (યુકે) : યુકેની પ્રતિષ્ઠિત કેન્ટ યુનિવર્સિટી અત્યારે એક ભયાનક સ્વાસ્થ્ય કટોકટીનો સામનો કરી રહી છે. મેનિન્જાઇટિસ અને સેપ્ટિસેમિયાના એક અત્યંત દુર્લભ અને આક્રમક સ્વરૂપના કારણે યુનિવર્સિટીના એક તેજસ્વી વિદ્યાર્થી સહિત બે લોકોના કરૂણ મોત નીપજ્યા છે. આ જીવલેણ રોગચાળાએ અન્ય ૧૧ યુવાનોને પણ પોતાની ઝપેટમાં લીધા છે, જેઓ અત્યારે હોસ્પિટલમાં જીવન અને મરણ વચ્ચે ઝોલા ખાઈ રહ્યા છે.
શું છે આ જીવલેણ બીમારી?
યુકે હેલ્થ સિક્યુરિટી એજન્સી (UKHSA) ના જણાવ્યા અનુસાર, આ રોગ મેનિન્જોકોકલ બેક્ટેરિયા દ્વારા ફેલાય છે જે મગજ અને કરોડરજ્જુની આસપાસના રક્ષણાત્મક પ્રવાહી પર હુમલો કરે છે. આ ઇન્ફેક્શન એટલું ઝડપી છે કે તે ગણતરીના કલાકોમાં લોહીના પ્રવાહને પણ ચેપ લગાડી દે છે, જેને કારણે શરીરમાં સેપ્સિસ (ઝેરી અસરો) પેદા થાય છે. કેન્ટરબરી વિસ્તારમાં અત્યાર સુધીમાં આવા ૧૩ કેસ નોંધાતા આરોગ્ય તંત્ર દોડતું થયું છે.
લક્ષણોને ઓળખવામાં ભૂલ ન કરો
આરોગ્ય નિષ્ણાતોએ ચેતવણી આપી છે કે વિદ્યાર્થીઓ આ રોગના પ્રારંભિક ચિહ્નોને સામાન્ય શરદી, ફ્લૂ અથવા 'હેંગઓવર' સમજીને અવગણી શકે છે, જે જીવલેણ સાબિત થઈ શકે છે. જો કોઈને અચાનક તાવ, ગંભીર માથાનો દુખાવો, ગરદન જકડાઈ જવી, પ્રકાશ પ્રત્યે સંવેદનશીલતા, શરીર પર લાલ ફોલ્લીઓ કે સાંધાનો દુખાવો થાય, તો વિલંબ કર્યા વગર તબીબી સહાય લેવી જોઈએ.
તંત્ર દ્વારા યુદ્ધના ધોરણે કામગીરી
UKHSA ની ટીમો અત્યારે અસરગ્રસ્ત લોકોના સંપર્કમાં આવેલા મિત્રો અને પરિવારોની ઓળખ કરી રહી છે અને તેમને અગમચેતીના ભાગરૂપે એન્ટિબાયોટિક્સ પૂરી પાડી રહી છે. કેન્ટ યુનિવર્સિટીએ પોતાના વિદ્યાર્થીના નિધન પર ઊંડા શોકની લાગણી વ્યક્ત કરી છે અને કેમ્પસમાં વિદ્યાર્થીઓની સુરક્ષા વધારવા માટે જાહેર આરોગ્ય ટીમો સાથે મળીને કામ કરવાની ખાતરી આપી છે. ચેરિટી સંસ્થા 'મેનિન્જાઇટિસ નાઉ' એ પણ યુવાનોને ચેતવ્યા છે કે જ્યાં લોકો સમૂહમાં રહેતા હોય ત્યાં આ બેક્ટેરિયા વધુ ઝડપથી ફેલાય છે.