સરકારી સ્કૂલના પ્રિન્સિપાલે ટોપ કરનારી વિદ્યાર્થિનીઓને કરાવી હેલિકોપ્ટરની સફર
જયપુર,તા.૧૭: રાજસ્થાનની એક સરકારી સ્કૂલના પ્રિન્સિપાલ રાજેન્દ્ર ઢાકાએ તેમના સ્ટુડન્ટ્સને પ્રોમિસ આપ્યું હતું કે જે વિદ્યાર્થીઓ સ્કૂલની પરીક્ષામાં ટોપ કરશે તેમને તેઓ જે ઇચ્છશે એ ઇનામ આપશે. આ પ્રોમિસ તેમણે નિભાવ્યું પણ ખરું. સ્કૂલની પરીક્ષામાં ત્રણ છોકરીઓ ટોપ પર આવી એટલે રાજેન્દ્ર ઢાકાએ તેમને પૂછ્યું કે ઇનામમાં તેમને શું જોઈએ છે? તો છોકરીઓએ હેલિકોપ્ટરમાં સફર કરવાની ઇચ્છા જતાવી. વિદ્યાર્થિનીઓની આ ઇચ્છાને પ્રિન્સિપાલે ગંભીરતાથી લીધી અને પોતાના અંગત ખર્ચે હેલિકોપ્ટરની વ્યવસ્થા કરાવીને તેમને જયપુરના આકાશમાં હેલિકોપ્ટરમાં ફેરવી. ગ્રામીણ વિસ્તારોમાંથી આવતી છોકરીઓ માટે હવાઈયાત્રા પહેલી વારનો અનુભવ હતો. તેમના માટે તો સપનું સાચું પડ્યા જેવો અનુભવ હતો. પ્રિન્સિપાલનું કહેવું છે કે આ પહેલનો ઉદ્દેશ માત્ર સ્ટુડન્ટ્સને ઇનામ આપવાનો જ નહોતો, પરંતુ વિદ્યાર્થીઓને ભણવા માટે પ્રેરિત કરવાનો હતો.
(10:26 AM IST)
છેલ્લા 8 દિવસમાં સૌથી લોકપ્રિય 
