ગાઝિયાબાદ, તા.17: બજારમાં ફળ ખરીદતી વખતે ઘણીવાર આપણે બહારથી ચમકતા ફળો જોઈને છેતરાઈ જઈએ છીએ, પરંતુ ઘરે આવીને તેને કાપતાની સાથે જ તે અંદરથી સડેલા નીકળે ત્યારે પૈસા અને મૂડ બંને બગડે છે. સામાન્ય માણસની આ રોજીંદી સમસ્યાનો ઉકેલ હવે વિજ્ઞાને શોધી કાઢ્યો છે. ગાઝિયાબાદના એક પ્રતિભાશાળી શિક્ષકે એવું 'સ્માર્ટ AI ડિવાઇસ' તૈયાર કર્યું છે, જે ફળને સ્પર્શ કર્યા કે કાપ્યા વગર જ તેની અંદરની તમામ વિગતો જણાવી દેશે.
શિક્ષક અને વિદ્યાર્થીઓની જોડીનો કમાલ
દયાનંદ નગર સ્થિત શંભુ દયાલ ગ્લોબલ સ્કૂલના શિક્ષક તેજસ મિશ્રાએ આ અનોખું મશીન વિકસાવ્યું છે. આ શોધ પાછળનો શ્રેય તેમના વિદ્યાર્થીઓને પણ જાય છે, જેમના સૂચન પર તેજસભાઈએ આ પ્રોજેક્ટ પર કામ શરૂ કર્યું હતું. આ ઉપકરણ આર્ટિફિશિયલ ઇન્ટેલિજન્સ (AI) અને મશીન લર્નિંગ ટેકનોલોજી પર આધારિત છે.
કેવી રીતે કામ કરશે આ 'સ્માર્ટ ચેકર'?
આ ઉપકરણમાં એક ખાસ સોફ્ટવેર ઇન્સ્ટોલ કરવામાં આવ્યું છે. જ્યારે પણ કોઈ ફળ આ મશીનની સામે રાખવામાં આવે છે, ત્યારે તે સેન્સર્સ અને AI ની મદદથી ફળની અંદરની તાજગી, તે કેટલું પાકેલું છે અને તેમાં કોઈ સડો છે કે નહીં, તેનો સંપૂર્ણ રિપોર્ટ સેકન્ડોમાં તૈયાર કરી દે છે. આ ટેકનોલોજીથી ગૃહિણીઓથી લઈને મોટા ફળ વિક્રેતાઓ સુધીના તમામ લોકોને મોટો ફાયદો થશે.
ફળોની ગુણવત્તાની પરખ હવે આસાન
અત્યાર સુધી ફળ તાજું છે કે નહીં તે જાણવા માટે આપણે તેને દબાવીને કે સૂંઘીને ચેક કરતા હતા, જે હંમેશા સચોટ હોતું નથી. પરંતુ તેજસ મિશ્રાનું આ 'સ્માર્ટ ફ્રૂટ ક્વોલિટી ચેકર' સો ટકા સચોટ માહિતી આપવાનો દાવો કરે છે. આ શોધથી આગામી સમયમાં સુપરમાર્કેટ અને મંડીઓમાં ફળોના વેસ્ટિંગમાં મોટો ઘટાડો જોવા મળી શકે છે.
ગાઝિયાબાદના આ શિક્ષકે સાબિત કરી દીધું છે કે જો મનમાં કંઈક નવું કરવાની ઈચ્છા હોય, તો સામાન્ય સંસાધનોથી પણ દુનિયા બદલી શકે તેવી ટેકનોલોજી બનાવી શકાય છે.