બેઇજિંગ:  મધ્ય પૂર્વમાં ચાલી રહેલા ભીષણ યુદ્ધ વચ્ચે ચીને એક અત્યંત મહત્વપૂર્ણ વ્યૂહાત્મક પગલું ભર્યું છે. ચીનના વિદેશ મંત્રાલયના પ્રવક્તા લિન જિયાને સત્તાવાર જાહેરાત કરી છે કે તેમનો દેશ ઈરાન, લેબનોન, જોર્ડન અને ઈરાક જેવા દેશોને તાત્કાલિક ધોરણે 'કટોકટી માનવતાવાદી સહાય' પૂરી પાડશે. બેઇજિંગ ભલે પોતાને શાંતિદૂત તરીકે રજૂ કરી રહ્યું હોય, પણ આર્થિક અને લશ્કરી રીતે ઈરાનનો સૌથી નજીકનો સાથી હોવાને કારણે ચીનની આ એન્ટ્રીએ અમેરિકા અને ઈઝરાયેલની ચિંતામાં વધારો કર્યો છે. ચીને સ્પષ્ટપણે અમેરિકા અને ઈઝરાયેલને તેમના હુમલાઓ રોકવા વિનંતી કરી છે, જેથી આ પ્રદેશમાં માનવતાવાદી કટોકટી વધુ ઘેરી ન બને.

આંતરરાષ્ટ્રીય સ્તરે રાજદ્વારી ગરમાવો ત્યારે વધ્યો જ્યારે અમેરિકી પ્રમુખ ડોનાલ્ડ ટ્રમ્પે આ યુદ્ધની સ્થિતિને ટાંકીને તેમની નિર્ધારિત બેઇજિંગ મુલાકાત મુલતવી રાખી છે. વ્હાઇટ હાઉસે હવે ચીન પાસે મદદની અપેક્ષા રાખી છે કે તે ઈરાન પર પોતાના પ્રભાવનો ઉપયોગ કરીને 'હોર્મુઝ સ્ટ્રેટ' (Strait of Hormuz) ફરીથી ખોલાવે. વિશ્વના કુલ તેલ પુરવઠાનો ૨૦ ટકા હિસ્સો આ માર્ગે પસાર થાય છે, જેને ઈરાને અમેરિકા-ઈઝરાયેલના હુમલાના વિરોધમાં બંધ કરી દીધો છે. ચીનના વિદેશ મંત્રી વાંગ યીએ આ યુદ્ધને અટકાવવાની જરૂરિયાત પર ભાર મૂક્યો છે, જે દર્શાવે છે કે ચીન હવે આ સંઘર્ષમાં મધ્યસ્થી તરીકેની ભૂમિકા ભજવવા માટે તૈયાર છે.

બીજી તરફ, રણમેદાનમાં ઈઝરાયેલના આક્રમક તેવર યથાવત છે. ઈઝરાયેલી મીડિયાના અહેવાલો મુજબ, રાતોરાત કરવામાં આવેલા હવાઈ હુમલામાં ઈરાનના સુરક્ષા વડા અલી લારીજાનીને નિશાન બનાવવામાં આવ્યા હતા. ટાઇમ્સ ઓફ ઇઝરાયેલના અહેવાલ મુજબ, આ હુમલા બાદ લારીજાની જીવિત છે કે કેમ તે અંગે હજુ સુધી કોઈ સત્તાવાર પુષ્ટિ મળી નથી. જો લારીજાની આ હુમલામાં માર્યા ગયા હોય, તો ઈરાન અને ઈઝરાયેલ વચ્ચેનું યુદ્ધ અંકુશ બહાર જઈ શકે છે. ચીન દ્વારા લેબનોન અને ઈરાકને સહાય મોકલવાના નિર્ણયને કારણે મધ્ય પૂર્વમાં સત્તાનું સંતુલન બદલાય તેવી પૂરેપૂરી સંભાવના છે.