રાજકોટ : જો તમે હજુ પણ તમારા જૂના આઇફોનને સાચવીને બેઠા હોવ અથવા તેનો ઉપયોગ કરી રહ્યા હોવ, તો આ સમાચાર તમારા માટે ચેતવણી સમાન છે. ટેક જાયન્ટ એપલ (Apple) એ સત્તાવાર રીતે તેના લોકપ્રિય એવા iPhone 5 અને 8GB મેમરી ધરાવતા iPhone 4 ને 'ઓબ્સોલિટ' (Obsolete) એટલે કે અપ્રચલિત કેટેગરીમાં સામેલ કરી દીધા છે. આ નિર્ણયનો અર્થ એ છે કે હવે આ ફોન માટે કંપની તરફથી કોઈ પણ પ્રકારની ટેકનિકલ મદદ કે સ્પેરપાર્ટ્સ મળી શકશે નહીં.
શું છે આ 'ઓબ્સોલિટ' લિસ્ટ?
એપલની નીતિ મુજબ, જે પ્રોડક્ટ્સનું વેચાણ બંધ થયાને સાત વર્ષથી વધુ સમય થઈ ગયો હોય, તેને કંપની 'ઓબ્સોલિટ' જાહેર કરે છે. આ કેટેગરીમાં આવ્યા પછી, એપલ તેના સર્વિસ સેન્ટર્સ કે અધિકૃત સર્વિસ પ્રોવાઇડર્સ દ્વારા તે ઉપકરણો માટે હાર્ડવેર રિપેરિંગની સુવિધા આપતી નથી. એટલે કે જો હવે તમારા iPhone 5 ની સ્ક્રીન તૂટે કે બેટરી ખરાબ થાય, તો તેને સત્તાવાર રીતે ઠીક કરાવી શકાશે નહીં.
iPhone 5 અને iPhone 4 (8GB) પર ગાજ
એક સમયે આઇફોન 5 તેની ડિઝાઈન અને ફીચર્સ માટે ખૂબ જ ફેમસ થયો હતો. તેવી જ રીતે આઇફોન 4 ના 8GB વેરિઅન્ટે સ્ટીવ જોબ્સના સમયમાં ઘણી લોકપ્રિયતા મેળવી હતી. જોકે, બદલાતી ટેકનોલોજી અને સોફ્ટવેર અપડેટ્સને કારણે આ મોડેલ્સ હવે આજના જમાના સાથે તાલ મેળવી શકતા નથી. અગાઉ 2026ની શરૂઆતમાં જ એપલે તેના વિન્ટેજ પ્રોડક્ટ લિસ્ટમાં પણ ફેરફાર કરીને કેટલાક જૂના મોડેલ્સને દૂર કર્યા હતા.
યુઝર્સ પર શું થશે અસર?
•    રિપેરિંગની સમસ્યા: સત્તાવાર રીતે સ્પેરપાર્ટ્સ મળવાના બંધ થશે.
•    સોફ્ટવેર અપડેટ: સુરક્ષા અને નવા ફીચર્સના અપડેટ્સ ઘણા સમયથી બંધ છે, જે હવે કાયમી ધોરણે બંધ રહેશે.
•    એપ્સની મર્યાદા: વોટ્સએપ જેવી ઘણી આધુનિક એપ્સ આ જૂના ઓપરેટિંગ સિસ્ટમ ધરાવતા ફોનમાં કામ કરવાનું બંધ કરી શકે છે.
એપલના આ નિર્ણયથી સ્પષ્ટ થાય છે કે કંપની હવે યુઝર્સને નવા અને આધુનિક 5G સક્ષમ આઇફોન મોડેલ્સ તરફ વળવા માટે પ્રોત્સાહિત કરી રહી છે. જો તમારી પાસે આ જૂના મોડેલ્સ હોય, તો તેમાં રહેલા ડેટાનો બેકઅપ લઈ લેવો હિતાવહ છે.