નવી દિલ્હી:ખાનગી કુરિયર કંપનીઓ સાથેની સ્પર્ધામાં ટકી રહેવા અને ઓપરેશન્સને વધુ ઝડપી બનાવવા માટે ઈન્ડિયા પોસ્ટે મંગળવારે ક્રાંતિકારી ફેરફારોની જાહેરાત કરી છે. કેન્દ્રીય સંચાર મંત્રી જ્યોતિરાદિત્ય સિંધિયાએ નવી દિલ્હીના આકાશવાણી ભવન ખાતેથી ત્રણ નવી પ્રીમિયમ સેવાઓ—૨૪ સ્પીડ પોસ્ટ, ૨૪ સ્પીડ પોસ્ટ પાર્સલ અને ૪૮ સ્પીડ પોસ્ટ—લોન્ચ કરી છે. આ સેવાઓ અંતર્ગત અત્યંત તાકીદના દસ્તાવેજો અને પાર્સલની ગેરંટીડ ડિલિવરી ૨૪ થી ૪૮ કલાકમાં કરવામાં આવશે.

પ્રથમ તબક્કામાં ૬ મેટ્રો શહેરોનો સમાવેશ:
પ્રથમ તબક્કા હેઠળ બેંગલુરુ, ચેન્નાઈ, દિલ્હી, હૈદરાબાદ, કોલકાતા અને મુંબઈમાં આ સેવાનો પ્રારંભ કરી દેવામાં આવ્યો છે. જ્યોતિરાદિત્ય સિંધિયાએ જણાવ્યું હતું કે, આગામી સપ્ટેમ્બર મહિનામાં બીજા તબક્કાનો વિસ્તાર કરી વધુ શહેરો ઉમેરવામાં આવશે અને માર્ચ ૨૦૨૭ સુધીમાં આ સેવા સમગ્ર દેશમાં ઉપલબ્ધ કરાવવાનું લક્ષ્ય છે. ઈન્ડિયા પોસ્ટના બિઝનેસમાં હાલ પાર્સલ સેવાનો હિસ્સો માત્ર ૫% છે, જેને આગામી સમયમાં મુખ્ય ગ્રોથ એન્જિન બનાવવાનું આયોજન છે.

સમયસર ડિલિવરી નહીં તો મની-બેક ગેરંટી:
ગ્રાહકોનો વિશ્વાસ જીતવા માટે વિભાગે ‘મની-બેક ગેરંટી’ની જાહેરાત કરી છે. જો ૨૪ કે ૪૮ કલાકની નિર્ધારિત સમયમર્યાદામાં ડિલિવરી કરવામાં વિભાગ નિષ્ફળ જશે, તો ગ્રાહકે ચૂકવેલી રકમ પરત કરવામાં આવશે. સુરક્ષા અને સચોટતા માટે ઓટીપી (OTP) આધારિત ડિલિવરી વેરિફિકેશન અને રિયલ ટાઈમ ટ્રેકિંગની સુવિધા પણ આપવામાં આવી છે. આ માટે વિભાગ સમર્પિત પ્રોસેસિંગ સિસ્ટમ અને પ્રાયોરિટી એર ટ્રાન્સપોર્ટનો ઉપયોગ કરશે.

નવી સેવાઓ માટેના દર:
 * ૨૪ સ્પીડ પોસ્ટ (માત્ર દસ્તાવેજ): સ્થાનિક ૫૦ ગ્રામ સુધીના દસ્તાવેજ માટે ₹ ૩૮ થી શરૂ કરી ૨,૦૦૦ કિમીથી વધુ અંતરના ૫૦૦ ગ્રામ સુધીના કન્સાઈનમેન્ટ માટે ₹ ૧૮૬ સુધીના દર રહેશે.
 * સ્પીડ પોસ્ટ પાર્સલ: ૫૦૦ ગ્રામ સુધીના પેકેજ માટે ₹ ૨૦૦ અને ૫ કિમી સુધીના પાર્સલ માટે ₹ ૯૯૦ સુધીનો ચાર્જ નક્કી કરાયો છે.

બિઝનેસ અને ઈ-કોમર્સ પર વિશેષ ધ્યાન:
કોર્પોરેટ ગ્રાહકો અને વ્યવસાયો માટે ‘બુક નાઉ, પે લેટર’ (BNPL), સેન્ટ્રલાઈઝ્ડ બિલિંગ અને બલ્ક કન્સાઈનમેન્ટ માટે ફ્રી પિકઅપ જેવી સુવિધાઓ ઉપલબ્ધ કરાવાઈ છે. આગામી ૫ વર્ષમાં ઈ-કોમર્સ માર્કેટ ₹ ૩૦ ટ્રિલિયન સુધી પહોંચવાની શક્યતા છે, જેને ધ્યાનમાં રાખીને ઈન્ડિયા પોસ્ટે તેની ડિલિવરી વ્યવસ્થાને વધુ મજબૂત બનાવી છે. નાણાકીય વર્ષ ૨૦૨૬ના પ્રથમ ૧૧ મહિનામાં પાર્સલ સેગમેન્ટમાં ૪૪% થી વધુનો ગ્રોથ નોંધાયો છે, જે આ નવી સેવાઓથી વધુ વેગ પકડશે તેવી અપેક્ષા મંત્રી જ્યોતિરાદિત્ય સિંધિયાએ વ્યક્ત કરી હતી.