વોશિંગ્ટન ડીસી, તા.૧૮: યુનાઇટેડ સ્ટેટ્સ હાલમાં કુદરતના રૌદ્ર સ્વરૂપનો સામનો કરી રહ્યું છે. એક શક્તિશાળી શિયાળુ તોફાન 'બોમ્બ સાયક્લોન'માં પરિવર્તિત થવાની ભીતિ વચ્ચે પૂર્વ કિનારાના તમામ મુખ્ય વ્યવહારો ખોરવાઈ ગયા છે. આ ભયાનક વાવાઝોડાને કારણે ન્યૂ યોર્ક, શિકાગો અને એટલાન્ટા જેવા મોટા શહેરોના એરપોર્ટ્સ પર સોમવારે ૪,૭૦૦ થી વધુ ફ્લાઈટ્સ રદ કરવી પડી છે, જ્યારે ૧૨,૦૦૦ થી વધુ ફ્લાઈટ્સ મોડી પડતા લાખો મુસાફરો રઝળી પડ્યા છે.
હવામાનશાસ્ત્રીઓના જણાવ્યા અનુસાર, જ્યારે વાવાઝોડાનું દબાણ ૨૪ કલાકમાં ૨૪ મિલીબાર જેટલું ઝડપથી ઘટે છે, ત્યારે તેને 'બોમ્બ સાયક્લોન' કહેવામાં આવે છે. આ સ્થિતિ અત્યંત જોખમી સાબિત થઈ રહી છે. મિશિગન અને દક્ષિણ ડાકોટા જેવા વિસ્તારોમાં ૨૦ ઇંચ સુધી બરફની ચાદર પથરાઈ ગઈ છે, જ્યારે મધ્ય-એટલાન્ટિક ક્ષેત્રમાં ૧૧૩ કિલોમીટર પ્રતિ કલાકની ઝડપે ફૂંકાતા પવનને કારણે વૃક્ષો અને વીજળીના થાંભલાઓ ધરાશાયી થયા છે. ટેક્સાસથી લઈને પૂર્વ કિનારા સુધીના લાખો ઘરોમાં વીજ પુરવઠો ઠપ થઈ જતાં લોકો ભારે હાડમારી ભોગવી રહ્યા છે.
વોશિંગ્ટન ડીસીમાં સુરક્ષાના ભાગરૂપે શાળાઓ વહેલી બંધ કરી દેવામાં આવી છે અને જાહેર કાર્યક્રમો રદ કરાયા છે. નેશનલ વેધર સર્વિસે ન્યૂ જર્સીથી ફ્લોરિડા સુધી ટોર્નેડો (ચક્રવાત)ની ચેતવણી પણ જારી કરી છે. બીજી તરફ, અમેરિકાના પશ્ચિમ ભાગમાં સ્થિતિ સાવ વિપરીત છે. કેલિફોર્નિયા અને ફોનિક્સ જેવા શહેરોમાં રેકોર્ડબ્રેક ગરમી પડવાની આગાહી કરવામાં આવી છે, જ્યાં આગામી દિવસોમાં તાપમાનના જૂના તમામ રેકોર્ડ તૂટી શકે છે.
હવાઈ ટાપુઓ પર પણ મુશળધાર વરસાદ અને પૂરને કારણે જનજીવન અસ્તવ્યસ્ત બન્યું છે. આમ, એક જ સમયે અમેરિકાના જુદા જુદા ભાગોમાં હિમવર્ષા, વાવાઝોડું, પૂર અને કાળઝાળ ગરમીનો અજીબ સંયોગ જોવા મળી રહ્યો છે. હવામાન વિભાગે નાગરિકોને બિનજરૂરી મુસાફરી ટાળવા અને સાવચેત રહેવા અપીલ કરી છે.