નવી દિલ્હી: દેશના હવામાનમાં ફરી એકવાર મોટો પલટો આવ્યો છે. ઉત્તર ભારતથી લઈને દક્ષિણ ભારત સુધી પશ્ચિમી વિક્ષેપ (Western Disturbance) સક્રિય થવાને કારણે ૧૬થી વધુ રાજ્યોમાં વરસાદ, વાવાઝોડા અને કરા પડવાની ચેતવણી જારી કરવામાં આવી છે. હવામાન વિભાગ (IMD) અનુસાર, ૧૮ માર્ચથી એક શક્તિશાળી સિસ્ટમ સક્રિય થઈ છે, જેના કારણે માત્ર ઉત્તર પ્રદેશ અને દિલ્હીને બાદ કરતા સમગ્ર દેશમાં 'યલો એલર્ટ' જાહેર કરવામાં આવ્યું છે.

કર્ણાટકના ધારવાડ જિલ્લાના કાલઘાટગીમાં તો કુદરતનો અજીબ નજારો જોવા મળ્યો હતો. અહીં એટલા મોટા પ્રમાણમાં કરા પડ્યા કે રસ્તાઓ અને ખેતરો બરફની સફેદ ચાદરથી ઢંકાઈ ગયા હતા, જેને જોઈને સ્થાનિકોએ આ વિસ્તારને 'મિની કાશ્મીર' ગણાવ્યો હતો. બીજી તરફ, પૂર્વોત્તર રાજ્ય મેઘાલયમાં કુદરતનો પ્રકોપ જોવા મળ્યો છે. અહીં રી ભોઈ જિલ્લામાં આવેલા ભયાનક વાવાઝોડાએ ૧,૦૨૮ ઘરોને નુકસાન પહોંચાડ્યું છે, જેના કારણે અંદાજે ૫,૦૦૦ લોકો બેઘર બન્યા છે.

હિમાચલ અને ઉત્તરાખંડમાં બરફની ચાદર

પહાડી રાજ્યોમાં મંગળવારથી જ હિમવર્ષા ચાલુ છે. બદ્રીનાથ ધામ, ચમોલી અને મનાલીના ઊંચાણવાળા વિસ્તારો સફેદ થઈ ગયા છે. તાપમાનમાં ૫ ડિગ્રી સુધીનો ઘટાડો નોંધાયો છે. રોહતાંગની અટલ ટનલ પાસે બરફ હટાવવા માટે BRO ના કર્મચારીઓ સતત કામ કરી રહ્યા છે. સોલાંગ વેલીમાં બરફવર્ષાનો આનંદ માણવા પ્રવાસીઓની ભીડ ઉમટી રહી છે, પરંતુ સ્થાનિક વહીવટીતંત્રે આગામી ૭૨ કલાક માટે ભારે વરસાદ અને હિમવર્ષાનું ઓરેન્જ એલર્ટ જારી કર્યું છે.

ગુજરાત અને અન્ય રાજ્યોમાં શું થશે?

રાજસ્થાન, મધ્યપ્રદેશ અને છત્તીસગઢમાં આગામી બે દિવસ વાવાઝોડા સાથે કરા પડવાની શક્યતા છે. રાજસ્થાનના સાત જિલ્લાઓમાં વરસાદની ચેતવણી છે, જ્યારે મધ્યપ્રદેશના ગ્વાલિયર, ઈન્દોર અને જબલપુરમાં પણ વાતાવરણ પલટાશે. ગુજરાતમાં પણ આ સિસ્ટમની અસરને પગલે વાદળછાયું વાતાવરણ અને છૂટાછવાયા વરસાદની શક્યતા નકારી શકાય તેમ નથી. બિહાર અને ઝારખંડમાં પણ ૪૦ કિમીની ઝડપે પવન ફૂંકાવા સાથે વરસાદ પડી શકે છે.

હવામાન વિભાગના જણાવ્યા અનુસાર, ૧૯ અને ૨૦ માર્ચ દરમિયાન ઉત્તર ભારતના મેદાની વિસ્તારોમાં ૫૦ થી ૭૦ કિમી પ્રતિ કલાકની ઝડપે પવન ફૂંકાઈ શકે છે. આ માવઠાને કારણે તૈયાર પાકને નુકસાન થવાની ભીતિ સેવાઈ રહી છે, તેથી ખેડૂતોને સાવચેત રહેવા સૂચના આપવામાં આવી છે.