વોશિંગ્ટન: અમેરિકાના પ્રમુખ ડોનાલ્ડ ટ્રમ્પે બુધવારે દેશમાં વધતી જતી મોંઘવારી અને ઈંધણના ભાવને અંકુશમાં લેવા માટે એક મોટો વહીવટી નિર્ણય લીધો છે. ટ્રમ્પે ૧૦૬ વર્ષ જૂના દરિયાઈ શિપિંગ કાયદા 'જોન્સ એક્ટ' માં ૬૦ દિવસ માટે કામચલાઉ છૂટછાટ આપવાની જાહેરાત કરી છે. આ નિર્ણયનો મુખ્ય હેતુ તેલ, કુદરતી ગેસ, ખાતર અને કોલસા જેવા મહત્વપૂર્ણ સંસાધનોના પુરવઠાને સરળ બનાવવાનો છે.

આ ઐતિહાસિક ફેરફાર ઈરાન અને ઈઝરાયેલ વચ્ચે ચાલી રહેલા યુદ્ધ 'ઓપરેશન એપિક ફ્યુરી' ને કારણે સર્જાયેલી વૈશ્વિક કટોકટી વચ્ચે આવ્યો છે. આ યુદ્ધને લીધે હોર્મુઝની સામુદ્રધુનીમાં અવરોધો ઉભા થતા અમેરિકામાં ગેસોલિનના ભાવમાં ૨૭% સુધીનો તોતિંગ વધારો થયો છે. 

સામાન્ય રીતે જોન્સ એક્ટ મુજબ, અમેરિકાના બે બંદરો વચ્ચે માલની હેરફેર માત્ર અમેરિકન જહાજો દ્વારા જ થઈ શકે છે, પરંતુ હવે વિદેશી ધ્વજવાળા જહાજો પણ આ પ્રક્રિયામાં ભાગ લઈ શકશે, જેનાથી પરિવહન ખર્ચમાં ઘટાડો થવાની અપેક્ષા છે.

વ્હાઇટ હાઉસના પ્રેસ સેક્રેટરી કેરોલિન લીવિટે સોશિયલ મીડિયા પ્લેટફોર્મ 'એક્સ' પર જણાવ્યું હતું કે આ પગલું તેલ બજારમાં ટૂંકા ગાળાના વિક્ષેપોને ઘટાડવા માટે લેવામાં આવ્યું છે. 

આ ઉપરાંત, વહીવટીતંત્રે બજારમાં સ્થિરતા લાવવા માટે 'સ્ટ્રેટેજિક પેટ્રોલિયમ રિઝર્વ' માંથી ૧૭.૨ કરોડ બેરલ તેલ છોડવાની પણ જાહેરાત કરી છે. આંતરરાષ્ટ્રીય મીડિયા રિપોર્ટ્સ અનુસાર, આ નિર્ણયથી અમેરિકાના પૂર્વ કિનારાના વિસ્તારોમાં ઇંધણના ભાવમાં તાત્કાલિક રાહત મળી શકે છે.