નવી દિલ્હી:  મધ્ય પૂર્વમાં સર્જાયેલા યુદ્ધના ઘેરા વાદળો વચ્ચે ભારતના પ્રધાનમંત્રી નરેન્દ્ર મોદીએ ફરી એકવાર વૈશ્વિક શાંતિ માટે કમાન સંભાળી છે. ગુરુવારે પીએમ મોદીએ ઓમાનના સુલતાન હૈથમ બિન તારિક અને મલેશિયાના પ્રધાનમંત્રી અનવર ઇબ્રાહિમ સાથે ઉચ્ચ સ્તરીય ટેલિફોનિક વાતચીત કરી હતી. ઈદ-ઉલ-ફિત્રની પવિત્ર શુભેચ્છાઓ પાઠવવાની સાથે પીએમ મોદીએ પશ્ચિમ એશિયામાં પ્રવર્તી રહેલા અત્યંત ચિંતાજનક તણાવ અંગે ઊંડી ચિંતા વ્યક્ત કરી હતી. 28 ફેબ્રુઆરીથી શરૂ થયેલા અમેરિકા-ઈઝરાયલ અને ઈરાન વચ્ચેના હુમલાઓએ સમગ્ર ગલ્ફ ક્ષેત્રને અસ્થિર કરી દીધું છે, ત્યારે ભારત આ સંઘર્ષને ઓછો કરવા માટે સક્રિય ભૂમિકા ભજવી રહ્યું છે.

આ વાતચીત દરમિયાન પીએમ મોદીએ વિશેષ કરીને હોર્મુઝ સ્ટ્રેટ માં સુરક્ષિત અને અવરોધ વિનાના જળમાર્ગ  ની જરૂરિયાત પર ભાર મૂક્યો હતો. વિશ્વના તેલ વેપાર માટે આ વ્યૂહાત્મક માર્ગ અત્યંત મહત્વનો છે, અને ત્યાં કોઈ પણ પ્રકારનો અવરોધ વૈશ્વિક અર્થતંત્રને ડામાડોળ કરી શકે તેમ છે. ઓમાનના સુલતાન સાથેની ચર્ચામાં મોદીએ સ્પષ્ટ કર્યું કે ભારત કોઈપણ દેશની સાર્વભૌમત્વ અને પ્રાદેશિક અખંડિતતાના ઉલ્લંઘનની સખત નિંદા કરે છે. આ સાથે જ તેમણે યુદ્ધગ્રસ્ત વિસ્તારોમાંથી ભારતીય નાગરિકો સહિત હજારો લોકોના સુરક્ષિત સ્થળાંતર માટે ઓમાન દ્વારા કરવામાં આવેલા સહયોગની મુક્તકંઠે પ્રશંસા કરી હતી.

મલેશિયાના વડાપ્રધાન અનવર ઇબ્રાહિમ સાથેની વાતચીતમાં પણ 'સંવાદ અને રાજદ્વારી'  ના રસ્તે ચાલવા પર સહમતિ સધાઈ હતી. ગલ્ફ સંઘર્ષ શરૂ થયો ત્યારથી પીએમ મોદી સતત સાઉદી અરેબિયા, UAE, ઈઝરાયલ અને ઈરાન જેવા દેશોના નેતાઓ સાથે સંપર્કમાં છે. ભારતની આ વ્યૂહરચના સ્પષ્ટ કરે છે કે દક્ષિણ એશિયાની સ્થિરતા માટે મધ્ય પૂર્વમાં શાંતિ હોવી અનિવાર્ય છે. પીએમ મોદીએ X પર જણાવ્યું કે ગલ્ફ ક્ષેત્રમાં સ્થિરતા લાવવા માટે ભારત દરેક સંભવિત પ્રયાસો કરવા અને રાજદ્વારી ચેનલોનો ઉપયોગ કરવા પ્રતિબદ્ધ છે.