ટોક્યો: ઉગતા સૂર્યના દેશ જાપાને પ્રવાસન ક્ષેત્રે એક નવો ઈતિહાસ રચી દીધો છે. ફેબ્રુઆરી મહિનામાં જાપાનની મુલાકાતે આવેલા પ્રવાસીઓની સંખ્યા અંદાજે ૩.૪૬ મિલિયન (૩૪.૬ લાખ) પર પહોંચી ગઈ છે. રાજદ્વારી ખેંચતાણને કારણે ચીનથી આવતા પ્રવાસીઓમાં મોટો ઘટાડો નોંધાયો હોવા છતાં, અન્ય દેશોના પ્રવાસીઓના ઉત્સાહને કારણે ગયા વર્ષની સરખામણીએ આ સંખ્યામાં ૬.૪% નો વધારો જોવા મળ્યો છે.
ચંદ્ર નવા વર્ષ અને ચેરી બ્લોસમનો જાદુ
જાપાન નેશનલ ટુરિઝમ ઓર્ગેનાઇઝેશન (JNTO) ના મતે, આ વખતે ફેબ્રુઆરીમાં 'લુનર ન્યૂ યર' (ચંદ્ર નવું વર્ષ) ની રજાઓ આવતા પ્રવાસીઓનો પ્રવાહ વધ્યો હતો. ખાસ કરીને પૂર્વી જાપાનમાં વહેલા ખીલતા 'કાવાઝુ સાકુરા' (ચેરી બ્લોસમ) જોવા માટે પ્રવાસીઓ તૂટી પડ્યા હતા. કાવાઝુ સાકુરા ફેસ્ટિવલમાં આ વર્ષે ૬,૩૦,૦૦૦ થી વધુ લોકો આવ્યા હતા, જે ૨૦૨૨ પછીનો સૌથી મોટો આંકડો છે.
ચીન પાછળ પડ્યું, દક્ષિણ કોરિયા અને તાઇવાન મોખરે
આશ્ચર્યજનક રીતે, ચીની પ્રવાસીઓની સંખ્યામાં ૪૫% નો તોતિંગ ઘટાડો નોંધાયો છે, તેમ છતાં જાપાનના પ્રવાસન ગ્રાફ પર તેની નકારાત્મક અસર પડી નથી. દક્ષિણ કોરિયાથી આવતા પ્રવાસીઓની સંખ્યા ૨૮% વધીને ૧.૦૮ મિલિયન થઈ છે, જ્યારે તાઇવાનથી આવતા પ્રવાસીઓમાં ૩૭% નો ઉછાળો જોવા મળ્યો છે.
વધતી ભીડ સામે નવા વિકલ્પોની શોધ
જાપાનમાં પ્રવાસીઓની વધતી ભીડને કારણે હવે મુસાફરો માર્ચના અંતથી એપ્રિલ દરમિયાન ચેરી બ્લોસમ જોવા માટે જાપાન સિવાયના અન્ય છ દેશોના વિકલ્પો પણ શોધી રહ્યા છે. ૨૦૨૬ માટેની ટ્રાવેલ યોજનાઓ અત્યારથી જ આકાર લઈ રહી છે, જેમાં પ્રવાસીઓ ભીડભાડ વગરના અને સરળતાથી પહોંચી શકાય તેવા સ્થળોને પ્રાધાન્ય આપી રહ્યા છે.
જાપાનનું આ આંકડાકીય પ્રદર્શન દર્શાવે છે કે એશિયન દેશોમાં પ્રવાસન માટે જાપાન હજુ પણ પ્રથમ પસંદગી બની રહ્યું છે.