મુંબઈ: ભારતીય સિનેમાના ચાહકો જેની લાંબા સમયથી પ્રતીક્ષા કરી રહ્યા હતા તે ફિલ્મ 'ધુરંધર 2' આજે ઈદના પવિત્ર અવસરે દેશભરના થિયેટરોમાં રિલીઝ થઈ ગઈ છે. રણવીર સિંહ સ્ટારર આ ફિલ્મે રિલીઝની સાથે જ બોક્સ ઓફિસ પર ધમાકેદાર શરૂઆત કરી છે. જોકે, આ વખતે ફિલ્મમાં સૌથી વધુ ચર્ચા જે બાબતની થઈ રહી છે, તે છે ફિલ્મનો મુખ્ય વિલન એટલે કે 'બડે સાહેબ'. પહેલા ભાગથી જે ચહેરાને છુપાવવામાં આવ્યો હતો, તેની ઓળખ આખરે બીજા ભાગમાં છતી થઈ છે.
 

ફિલ્મના પહેલા ભાગથી જ પ્રેક્ષકોના મનમાં એક સવાલ હતો કે આ આખા કાવતરાનો માસ્ટરમાઇન્ડ કોણ છે? 'ધુરંધર 2' માં આ રહસ્ય પરથી પડદો હટાવી દેવામાં આવ્યો છે. 'બડે સાહેબ'નું પાત્ર અંડરવર્લ્ડ ડોન દાઉદ ઈબ્રાહિમથી પ્રેરિત છે. આ જટિલ અને રહસ્યમય ભૂમિકા જાણીતા થિયેટર કલાકાર દાનિશ ઈકબાલે ભજવી છે. દાનિશ અગાઉ 'મહારાણી 2' જેવી વેબ સિરીઝમાં પોતાના અભિનયનો જાદુ ચલાવી ચૂક્યા છે.
ફિલ્મમાં 'બડે સાહેબ'ને એક બીમાર અને વૃદ્ધ ડોન તરીકે દર્શાવવામાં આવ્યા છે, જે ઓક્સિજન સપોર્ટ અને મેડિકલ સાધનો પર જીવી રહ્યા છે. ભલે તેમની સ્ક્રીન સ્પેસ મર્યાદિત છે, પરંતુ હોસ્પિટલના બેડ પર બેઠા-બેઠા ભારત વિરુદ્ધ તેઓ જે રીતે કાવતરું ઘડે છે, તે જોઈને પ્રેક્ષકોના રૂંવાડા ઉભા થઈ જાય છે. જોકે, કેટલાક વિવેચકોનું માનવું છે કે આ પાત્રની આસપાસ જે હાઈપ ઉભી કરવામાં આવી હતી, તેના પ્રમાણમાં તેમને વધુ સમય મળવો જોઈતો હતો.
 રણવીર સિંહની આ ફિલ્મમાં અર્જુન રામપાલ, આર. માધવન, સંજય દત્ત અને રાકેશ બેદી જેવા દિગ્ગજ કલાકારોની ફોજ છે. ઈદની રજાનો પૂરેપૂરો લાભ ફિલ્મને મળી રહ્યો છે અને એડવાન્સ બુકિંગના આંકડા જોતા એવું લાગે છે કે 'ધુરંધર 2' વર્ષ ૨૦૨૬ની સૌથી મોટી બ્લોકબસ્ટર સાબિત થશે. સિનેમાઘરોમાં રણવીર સિંહના એક્શન સીન્સ પર ચાહકો સીટીઓ વગાડી રહ્યા છે.