યુકેમાં બે ગુજરાતીઓને રૂ. ૩.૭૦ લાખમાં પડી પાનની પિચકારી
૨૦૨૫માં પિચકારી મારતા પકડાયેલા બંને લોકોએ દંડ ના ભરતા કોર્ટમાં કેસ કરવામાં આવ્યો જેના કારણે દંડની રકમ ૧૩ ગણી વધી ગઈ
લંડન તા.૨૦: દુનિયાના કોઈપણ દેશમાં વસેલા ગુજરાતી જેમ પોતાનું કલ્ચર નથી છોડતાં તેમ અમુક લોકો પાન-મસાલા ખાઈને જ્યાં-ત્યાં પિચકારી મારવાની આદત પણ નથી છોડી શકતા. અમેરિકા હોય કે પછી યુકે, જ્યાં ગુજરાતીઓની વસ્તી હોય ત્યાં પાનની પિચકારીઓ પણ અવશ્ય જોવા મળતી હોય છે પણ લંડનના એક કેસમાં પિચકારી મારીને ગંદકી ફેલાવનારા બે ગુજરાતીઓને મસમોટો દંડ ફટકારવામાં આવ્યો છે.
અક્ષિત પટેલ અને હિતેશ પટેલ નામના આ બંને ગુજરાતીઓને ગયા વર્ષે થૂંકતા પકડવામાં આવ્યા હતા, તેમણે ઈચ્છ્યું હોત તો તેઓ તે વખતે જ ૧૦૦ પાઉન્ડનો દંડ ભરીને છૂટી ગયા હોત પરંતુ યુકેને પણ ઈન્ડિયા સમજી લઈ આ બંને મામલાને કોર્ટમાં લઈ ગયા હતા અને પછી જજ સમક્ષ હાજર પણ નહોતા થયા જેથી દંડની રકમ અનેકગણી વધી ગઈ હતી.
અમારા સાથી અખબાર ટાઈમ્સ ઓફ ઈન્ડિયાના રિપોર્ટ અનુસાર લંડનને અડીને આવેલા એજવેરમાં રહેતા આરોપી નંબર ૧ અક્ષિત પટેલને ચાલુ મહિનાાં જ નોર્થ વેસ્ટ લંડન મેજિસ્ટ્રેટની કોર્ટે ૧,૩૯૧ પાઉન્ડ એટલે કે લગભગ પોણા બે લાખ રૂપિયાનો દંડ ફટકાર્યો હતો. પિચકારી મારતા પકડાયેલો અક્ષિત કોર્ટમાં હાજર ના રહ્યો હોવાથી તેની ગેરહાજરીમાં જ તેને ગુનેગાર ઠેરવવામાં આવ્યો હતો. આ મહાશયે કિગ્સબરીમાં એક રોડ પર જૂન ૧૧, ૨૦૨૫ના રોજ પિચકારી મારી હતી.
તે વખતે તેને ૧૦૦ પાઉન્ડનો દંડ ભરવા જણાવાયું હતું પરંતુ તેણે દંડ ચૂકવવાનો ઈનકાર કરી દેતા મામલો કોર્ટમાં પહોંચ્યો હતો અને દંડની રકમ પણ વધીને ૧૩૯૧ પાઉન્ડ થઈ ગઈ હતી. તેવી જ રીતે રાઈસ્લપમાં રહેતા હિતેષ પટેલને વેમ્બલી હિલમાં જૂન ૧૨, ૨૦૨૫ના રોજ પિચકારી મારતા પકડવામાં આવ્યો હતો અને તેણે પણ ત્યારે દંડ નહોતો ભર્યો, હિતેષને કોર્ટમાં હાજર થવાનું હતું પણ અક્ષિતની જેમ તેણે પણ તેની કોઈ ખાસ દરકાર નહોતી લીધી જેથી તેને કસૂરવાર ઠેરવી લંડનની કોર્ટે તેનેય ૧,૩૯૧ પાઉન્ડનો દંડ ફટકાર્યો હતો.
લંડનને અડીને આવેલા વેમ્બલીમાં ગુજરાતીઓની ખાસ્સી વસ્તી છે પરંતુ આ વિસ્તાર ગંદકીને કારણે અવારનવાર ચર્ચામાં આવતો હોય છે, ખાસ તો ઠેર-ઠેર જોવા મળતી પાનની પિચકારી વેમ્બલીની ઓળખ માનવામાં આવે છે. અહીંની બ્રેન્ટ કાઉન્સિલ પિચકારીના દાગ સાફ કરવા માટે એક વર્ષમાં ત્રીસેક હજાર પાઉન્ડથી પણ વધુનો ખર્ચો કરે છે પરંતુ હાઈ-પાવર ઈન્ડસ્ટ્રિયલ જેટ સ્પ્રેથી પણ ઘણી જગ્યાએ પિચકારીના ડાઘા સાફ નથી કરી શકાતા.
અહીં પિચકારી મારતા પકડાય તેની પાસેથી સ્થળ પરથી જ ૧૦૦ પાઉન્ડનો દંડ વસૂલવામાં આવે છે પરંતુ દંડ વસૂલનારા કરતા પિચકારી મારનારા અનેક ગણા વધારે હોવાને લીધે આ દૂષણને અનેક પ્રયાસો બાદ પણ નાથી નથી શકાયું. લંડનમાં ઠેક-ઠેકાણે ગુજરાતીમાં પણ પાન-મસાલાની પિચકારી મારીને ગંદકી ના ફેલાવવી તેવા બોર્ડ મૂકવામાં આવ્યા છે પરંતુ આપણી પબ્લિક આવા બોર્ડ અથવા સ્ટીકર પર પણ પિચકારીઓ મારીને પોતાનું શૂરાતન બતાવવા માટે જાણીતી છે.
ફોરેન કન્ટ્રીઝમાં ઈન્ડિયામાં મળે છે તેવી તમાકુ પ્રોડક્ટ્સ પણ પ્રતિબંધિત હોવા છતાંય લોકો ઈન્ડિયાથી તેના પાર્સલ મગાવતા હોય છે અને જો કોઈ લાંબા સમય માટે ફોરેન જતું હોય તો પોતાનો સ્ટોક તે પહેલા કરી લે છે. જેવી રીતે લંડનના અમુક વિસ્તારોમાં આપણા દેસીઓ બેફામ ગંદકી ફેલાવે છે તેવી જ રીતે અમેરિકામાં ન્યૂજર્સી અને શિકાગોમાં પણ કેટલીક જગ્યાએ પાનમસાલા આરામથી મળી જાય છે અને જો કોઈ વિસ્તારમાં પિચકારીઓ મારેલી દેખાય તો પબ્લિક સમજી લે છે કે ગુજરાતીઓનો એરિયા આવી ગયો
(10:06 AM IST)
છેલ્લા 8 દિવસમાં સૌથી લોકપ્રિય 
