તા. ૧૦ સપ્ટેમ્બર ર૦ર૫ વિક્રમ સંવત ર૦૮૧ ભાદરવો વદ – ૩ બુધવાર
રિસેપ્શનના થોડા સમય પહેલા જ દુલ્હન પોતાના પ્રેમી સાથે ભાગી ગઈ
UPમાં 'લૂંટેરી દુલ્હન' જેવો ઘાટ : હવે વરરાજા પોતાના લગ્નનું સર્ટિફિકેટ લઈને એક ઓફિસથી બીજી ઓફિસમાં ચક્કર મારી રહ્યો છે
ઝાંસી,તા.૨૦: ઉત્તર પ્રદેશના ઝાંસીમાં એક અનોખો બનાવ સામે આવ્યો છે. અહીં રિસેપ્શનના થોડા સમય પહેલા જ દુલ્હન પોતાના પ્રેમી સાથે ભાગી ગઈ હતી. હવે વરરાજા પોતાના લગ્નનું સર્ટિફિકેટ લઈને એક ઓફિસથી બીજી ઓફિસમાં ચક્કર મારી રહ્યો છે. વરરાજાનું કહેવું છે કે, છોકરીના પરિવારજનોના કહેવા પર મુખ્યમંત્રી સામૂહિક વિવાહ સમારોહમાં અમારા લગ્ન થયા હતા. જેમાં સરકાર તરફથી જે સહાય મળી હતી, તે પણ દુલ્હન તેની સાથે લઈ ગઈ છે. સમગ્ર મામલે પોલીસ હાલ તપાસ કરી રહી છે.
મળતી માહિતી મુજબ, ઝાંસીના સીપરી બજાર વિસ્તારમાં રહેતા યુવકના લગ્ન બબીના વિસ્તારમાં રહેતી યુવતી સાથે નક્કી થયા હતા. યુવકનું કહેવું છે કે, તે સાયબર કેફે ચલાવે છે. છોકરીના માતા-પિતાની આર્થિક સ્થિતિ નબળી હોવાથી તેમણે મુખ્યમંત્રી સામૂહિક વિવાહ સમારોહમાં લગ્ન કરવાની વાત કરી હતી જેથી સરકાર તરફથી સહાય મળી શકે. બંને પરિવારે આ માટે સહમતિ આપી અને ૧૯ ફેબ્રુઆરીએ યોજાયેલા સામૂહિક લગ્ન સમારોહમાં બંનેના લગ્ન થયા હતા.
લગ્ન પછી બંને ખુશ હતા અને નક્કી કર્યું હતું કે ૨૫ એપ્રિલે રિસેપ્શન રાખી દુલ્હનને વિદાય આપશે, પરંતુ રિસેપ્શનની તારીખ આવતા પહેલા જ, સરકાર તરફથી મળેલી ૬૦ હજાર રૂપિયાની સહાય લઈ દુલ્હન પોતાના પ્રેમી સાથે ભાગી ગઈ હતી. જ્યારે વરરાજાને આ વાતની જાણ થઈ, ત્યારે તેણે દુલ્હનના પરિવારજનોનો સંપર્ક કર્યો હતો. પરિવારજનોનું કહેવું છે કે, તેમણે સીપરી બજાર પોલીસ સ્ટેશનમાં ફરિયાદ કરી છે અને દુલ્હનની ગુમ થયાની ફરિયાદ નોંધાવી છે.
વરરાજાનું કહેવું છે કે, હવે તેને પોતાની પત્ની પર કોઈ વિશ્વાસ નથી. જો દુલ્હન હવે પાછી આવે તો પણ તે તેની સાથે નહીં રહે. તેને માત્ર એટલું જ જોઈએ છે કે, દુલ્હન આવીને સાચી વાત કહી દે.
વરરાજાએ વધુમાં કહ્યું છે કે, દુલ્હનના પરિવારજનોના કહેવા પર તેણે મુખ્યમંત્રી સામૂહિક વિવાહ માટે ફોર્મ ભર્યું હતું. ૧૯ ફેબ્રુઆરીએ લગ્ન થયા અને મેરેજ સર્ટિફિકેટ પણ મળી ગયું હતું. લગ્ન પછી તરત જ સરકાર તરફથી મળેલી ૬૦ હજાર રૂપિયાની સહાય લઈ દુલ્હન પોતાના પ્રેમી સાથે ભાગી ગઈ હતી. દુલ્હન કોની સાથે ભાગી છે તેનું નામ વરરાજાને પણ ખબર નથી.
વરરાજાનું કહેવું છે કે, હવે તે દુલ્હનથી છૂટાછેડા ઇચ્છે છે. જો દુલ્હન પાછી આવે તો પણ તે તેની સાથે નહીં રહે, કારણ કે હવે તેનો કોઈ વિશ્વાસ નથી. વરરાજાએ જણાવ્યું કે, તેણે મસીહાગંજ ચોકી પોલીસ અને સમાજ કલ્યાણ વિભાગમાં પણ ફરિયાદ કરી છે. જ્યારે સીપરી બજાર પોલીસ સ્ટેશનના મસીહાગંજ ચોકીના ઇન્ચાર્જ સાજેશ કુમારે ફોન પર જણાવ્યું હતું કે, દુલ્હનની ગુમ થયાની અરજી નોંધાઈ છે. દુલ્હન સાથે વાત કરતાં જાણવા મળ્યું છે કે, તેણે મધ્ય પ્રદેશના ભાંડેરમાં રહેતા પોતાના પ્રેમી સાથે કોર્ટ મેરેજ કરી લીધા છે અને હવે તે તેના પ્રેમી સાથે જ રહેવાની છે. દુલ્હને સ્પષ્ટ કહ્યું છે કે, તે હવે પાછી નથી આવવાની.
(3:35 PM IST)
છેલ્લા 8 દિવસમાં સૌથી લોકપ્રિય 
