વોશિંગ્ટન:  મધ્ય પૂર્વમાં ચાલી રહેલો તણાવ હવે નિર્ણાયક તબક્કે પહોંચ્યો હોય તેવું લાગી રહ્યું છે. પ્રમુખ ડોનાલ્ડ ટ્રમ્પ ભલે જાહેરમાં સૈન્ય તૈનાત કરવાનો ઇનકાર કરી રહ્યા હોય, પરંતુ ૨,૨૦૦ અત્યંત ઘાતક મરીન્સ સાથે USS ત્રિપોલીનું હિંદ મહાસાગરમાં આગમન કંઈક મોટા ઓપરેશનનો સંકેત આપી રહ્યું છે. આ યુદ્ધ જહાજ માત્ર એક નૌકાદળનું સાધન નથી, પરંતુ F-35 સ્ટીલ્થ ફાઇટર જેટ્સ અને એટેક હેલિકોપ્ટર્સથી સજ્જ એક 'મોબાઇલ કિલ્લો' છે. નિષ્ણાતોના મતે, ટ્રમ્પનો ઇનકાર તેમની વ્યૂહાત્મક ગુપ્તતાનો ભાગ હોઈ શકે છે, કારણ કે સેટેલાઇટ છબીઓ સ્પષ્ટપણે આ વિશાળ જહાજને ઈરાન તરફ આગળ વધતું દર્શાવી રહી છે. જો આ દળો મેદાનમાં ઉતરશે, તો તે છેલ્લા બે દાયકામાં અમેરિકાનું સૌથી મોટું અને જોખમી સૈન્ય અભિયાન સાબિત થશે.

આ સંભવિત હુમલા પાછળનું પ્રાથમિક કારણ આર્થિક અને વ્યૂહાત્મક છે. ૨૮ ફેબ્રુઆરીથી ઈરાને હોર્મુઝ સ્ટ્રેટ પર જે રીતે પોતાનો સકંજો કસ્યો છે, તેનાથી વૈશ્વિક તેલ બજારમાં હાહાકાર મચી ગયો છે. વિશ્વના ૨૦% તેલ પુરવઠા પર ઈરાનનો અંકુશ અને પશ્ચિમી જહાજો પાસેથી વસૂલવામાં આવતો તોતિંગ ટેક્સ અમેરિકા માટે અસહ્ય બન્યો છે. ટ્રમ્પ ઈચ્છે છે કે આ મહત્વપૂર્ણ જળમાર્ગને ઈરાની જોખમમાંથી કાયમી મુક્ત કરવામાં આવે. આ માટે USS ત્રિપોલી પર સવાર મરીન્સનો ઉપયોગ ઈરાની કિનારાના નાના ટાપુઓ પર કબજો મેળવવા અને ત્યાંથી વ્યાપારી જહાજોને સુરક્ષિત 'કોરિડોર' પૂરો પાડવા માટે કરવામાં આવી શકે છે.

આ લશ્કરી હિલચાલ પાછળનું બીજું અને વધુ ગંભીર કારણ ઈરાનનું પરમાણુ શસ્ત્રાગાર છે. અહેવાલો મુજબ, ઈરાની સૈન્ય થાણાઓના કાટમાળ નીચે ૯૫૦ પાઉન્ડ જેટલું અત્યંત સમૃદ્ધ યુરેનિયમ દટાયેલું છે. આ 'પરમાણુ ખજાનો' કોઈ પણ સંજોગોમાં ઈરાનના હાથમાં ફરી ન આવે તે માટે ગ્રાઉન્ડ ફોર્સની જરૂરિયાત અનિવાર્ય બની છે. ટ્રમ્પનું 'મિશન ઈરાન' માત્ર યુદ્ધ જીતવા પૂરતું મર્યાદિત નથી, પરંતુ મધ્ય પૂર્વના નકશા પરથી પરમાણુ જોખમને જમીની સ્તરે ઉતરીને ખતમ કરવાનું છે. આવતા અઠવાડિયે જો USS ત્રિપોલીના સૈનિકો એક્શનમાં આવશે, તો તે વિશ્વના ઈતિહાસમાં એક નવો વળાંક અંકિત કરશે.