કુશીનગર : રક્સૌલથી દિલ્હીના આનંદ વિહાર જતી ૧૫૨૭૩ સત્યાગ્રહ એક્સપ્રેસમાં મુસાફરી કરી રહેલા એક ૨૬ વર્ષીય યુવાન પર જીવલેણ હુમલો થયો હોવાની ઘટના સામે આવી છે. ગોરખપુર-નરકટિયાગંજ રેલવે લાઇન પર આવેલા પાણીયાહવા સ્ટેશન નજીક અજાણ્યા બદમાશોએ ટ્રેન પર જોરદાર પથ્થરમારો કર્યો હતો. આ પથ્થરમારામાં ટ્રેનના દરવાજા પાસે બેઠેલા આઝાદ નામના મુસાફરને માથાના ભાગે ગંભીર ઈજા પહોંચી હતી.

માથામાં પથ્થર વાગતા ટ્રેનમાં મચી ચીસાચીસ

પીલીભીતના રહેવાસી આઝાદ બિહારથી પરત ફરી રહ્યો હતો ત્યારે આ અકસ્માત સર્જાયો હતો. પથ્થર વાગતા જ આઝાદ લોહીલુહાણ થઈ ગયો હતો, જેને જોઈને અન્ય મુસાફરોમાં ગભરાટ ફેલાઈ ગયો હતો. તેને તાત્કાલિક ખડ્ડાના સામુદાયિક આરોગ્ય કેન્દ્રમાં લઈ જવામાં આવ્યો હતો, પરંતુ હાલત નાજુક જણાતા તેને રવિન્દ્ર નગર મેડિકલ કોલેજમાં રિફર કરવામાં આવ્યો છે. રેલવે પોલીસ હવે આ પથ્થરમારો કરનારા તત્વોની શોધખોળ કરી રહી છે.

ગેટમેન ઊંઘતો રહ્યો અને ટ્રેન આવી ગઈ!

આ જ રેલવે લાઇન પર ખડ્ડાના સુભાષ ચોક પાસે ગેટમેનની ગંભીર બેદરકારી જોવા મળી હતી. એક પેસેન્જર ટ્રેન ક્રોસિંગ પર આવીને ઊભી રહી ગઈ પરંતુ ગેટમેન પોતાની કેબિનમાં નિરાંતે ઊંઘતો હતો. મુસાફરોએ તેને જગાડ્યા બાદ તેણે ગેટ ખોલ્યો, પરંતુ બીજી જ મિનિટે બીજી ટ્રેન આવવાના સમાચાર મળતા ઉતાવળમાં ગેટ બંધ કરવા જતા એક શેરડી ભરેલી ટ્રેક્ટર-ટ્રોલી બેરિયર સાથે અથડાઈ હતી. આ હંગામાને કારણે અડધા કલાક સુધી હાઈવે પર વાહનોની લાંબી કતારો લાગી ગઈ હતી.