વોશિંગ્ટન:  પશ્ચિમ એશિયામાં ચાલી રહેલા ભીષણ સંઘર્ષ વચ્ચે અમેરિકાના ટોચના ભૂતપૂર્વ અધિકારી ડેનિયલ બેનૈમે ભારતની વધતી વૈશ્વિક તાકાત અંગે મોટું નિવેદન આપ્યું છે. તેમણે જણાવ્યું છે કે ગલ્ફ દેશો હવે ભારતને માત્ર કામદારો મોકલનારા દેશ તરીકે નહીં, પરંતુ ૨૧મી સદીના મુખ્ય મધ્યસ્થી અને ભવિષ્યની મહાસત્તા તરીકે જુએ છે. ઈરાન અને ઇઝરાયલ વચ્ચે વધતા તણાવ અને ઊર્જા માળખા પર થતા હુમલાઓ વચ્ચે, સાઉદી અરેબિયા અને યુએઈ જેવા દેશો વડાપ્રધાન નરેન્દ્ર મોદીની વ્યૂહાત્મક સમજ અને તમામ પક્ષો સાથે વાતચીત કરવાની ક્ષમતા પર ભરોસો મૂકી રહ્યા છે.

બેનૈમના મતે, વડાપ્રધાન મોદી અને યુએઈના રાષ્ટ્રપતિ મોહમ્મદ બિન ઝાયેદ વચ્ચેની ગાઢ મિત્રતા આ ક્ષેત્રમાં શાંતિ સ્થાપવા માટે પાયાનો પથ્થર સાબિત થઈ શકે તેમ છે. સાઉદી અરેબિયા પણ હવે પાકિસ્તાન સાથેના તેના જૂના સંબંધોને બાજુ પર રાખીને ભારત સાથે "વ્યાપક અને વ્યૂહાત્મક" ભાગીદારી કરવા માટે તૈયાર છે. ગલ્ફ દેશોમાં વસતો વિશાળ ભારતીય સમુદાય અને ભારતની આર્થિક પ્રગતિએ આરબ જગતને ખાતરી આપી છે કે નવી દિલ્હી પ્રાદેશિક સ્થિરતા જાળવવામાં નિર્ણાયક ભૂમિકા ભજવી શકે છે.

વર્તમાન સુરક્ષા પરિસ્થિતિ ગંભીર છે, જ્યાં ઈરાને તાજેતરમાં ઇઝરાયલી હુમલાના જવાબમાં ગલ્ફ ક્ષેત્રના ઊર્જા માળખાને નિશાન બનાવ્યું છે. આવા સમયે જ્યારે અમેરિકા અને અન્ય પશ્ચિમી દેશો દબાણ હેઠળ છે, ત્યારે ભારત એક એવા તટસ્થ પ્લેટફોર્મ તરીકે ઉભરી આવ્યું છે જે ઇઝરાયલ અને ઈરાન બંને સાથે સંવાદ જાળવી રાખવા સક્ષમ છે. જો ભારત આ સંઘર્ષમાં સફળતાપૂર્વક મધ્યસ્થી કરે છે, તો તે ૨૧મી સદીના વૈશ્વિક નકશા પર એક અજેય મહાસત્તા તરીકે સ્થાપિત થઈ જશે.