ચેન્નાઈ: તમિલ સિનેમાના 'થલપતિ' વિજયની મોસ્ટ અવેટેડ ફિલ્મ 'જાન નાયગન' (Jaan Nayagan) અત્યારે વિવાદોના વમળમાં ફસાઈ છે. પોતાની રાજકીય કારકિર્દી શરૂ કરતા પહેલા વિજયની આ છેલ્લી ફિલ્મ હોવાથી ચાહકોમાં ભારે ઉત્સાહ છે, પરંતુ સેન્સર બોર્ડ (CBFC) બાદ હવે આ મામલો ભારતીય ચૂંટણી પંચ (ECI) સુધી પહોંચ્યો છે. ફિલ્મને મંજૂરી આપવી કે નહીં તે અંગે હવે ચૂંટણી પંચ આખરી નિર્ણય લેશે.

કેમ લેવી પડશે ચૂંટણી પંચની મંજૂરી?

વિજયે પોતાની રાજકીય પાર્ટી 'તમિલગા વેટ્રી કઝગમ' (TVK) સાથે આગામી એપ્રિલમાં યોજાનારી તમિલનાડુ વિધાનસભા ચૂંટણીમાં ઝંપલાવ્યું છે. રાજ્યમાં ૧૫ માર્ચથી આદર્શ આચારસંહિતા (MCC) લાગુ થઈ ગઈ છે. 'જાન નાયગન' ફિલ્મમાં વિજય એક પ્રબળ રાજકીય વિરોધીની ભૂમિકામાં છે. ચૂંટણી અધિકારીઓના મતે, જો ફિલ્મમાં એવી કોઈ સામગ્રી હોય જે કોઈ ચોક્કસ પક્ષને ફાયદો કરાવે અથવા મતદારોને પ્રભાવિત કરે, તો તે આચારસંહિતાનું ઉલ્લંઘન ગણી શકાય. તમિલનાડુના મુખ્ય ચૂંટણી અધિકારી અર્ચના પટનાયકે જણાવ્યું છે કે, આ એક નવી પરિસ્થિતિ છે અને કમિશન ફિલ્મની સામગ્રીની તપાસ કરીને યોગ્ય નિર્ણય લેશે.

રિલીઝમાં સતત વિલંબ અને કાયદાકીય લડાઈ

એચ. વિનોથ દ્વારા દિગ્દર્શિત આ ફિલ્મ મૂળ ૯ જાન્યુઆરીએ રિલીઝ થવાની હતી. જોકે, સેન્સર બોર્ડની રિવાઇઝિંગ કમિટીએ રાજકીય સંદર્ભોને કારણે પ્રમાણપત્ર આપવામાં વિલંબ કર્યો હતો. આ વિલંબથી કંટાળીને નિર્માતાઓએ CBFC સામે કોર્ટના દ્વાર પણ ખખડાવ્યા હતા. મુંબઈમાં સેન્સર બોર્ડની ટીમે ફરીથી ફિલ્મની સમીક્ષા કરી છે અને હવે દડો ચૂંટણી પંચના મેદાનમાં છે.

ચાહકોની આતુરતા અને અનિશ્ચિતતા

વિજયના ચાહકો માટે આ ફિલ્મ માત્ર એક મનોરંજન નથી, પરંતુ તેમના લાડકા અભિનેતાની વિદાય ફિલ્મ છે. કેનેડિયન વિતરક યોર્ક સિનેમાસે અગાઉ સંકેત આપ્યા હતા કે ફિલ્મ ૩૦ એપ્રિલ પહેલા રિલીઝ થવાની શક્યતા ઓછી છે. હવે જ્યારે ૪ મેના રોજ મતગણતરી થવાની છે, ત્યારે શું 'જાન નાયગન' ચૂંટણી પહેલા સિનેમાઘરોમાં પહોંચશે કે પછી ચાહકોએ પરિણામોની રાહ જોવી પડશે, તે જોવું રસપ્રદ રહેશે.