નવી દિલ્હી: વિશ્વભરના વિવેચકો દ્વારા વખાણાયેલી અને આ વર્ષે શ્રેષ્ઠ આંતરરાષ્ટ્રીય ફિલ્મ શ્રેણીમાં ઓસ્કાર નોમિનેશન મેળવનારી ફિલ્મ 'ધ વોઇસ ઓફ હિંદ રજબ' (The Voice of Hind Rajab) ભારતમાં વિવાદોના વમળમાં ફસાઈ છે. સેન્ટ્રલ બોર્ડ ઓફ ફિલ્મ સર્ટિફિકેશન (CBFC) એ આ ફિલ્મને ભારતીય સિનેમાઘરોમાં રિલીઝ કરવા માટે જરૂરી પ્રમાણપત્ર આપવાનો સ્પષ્ટ ઇનકાર કરી દીધો છે.

રાજદ્વારી સંબંધો પર અસર પડવાનો ભય

ફિલ્મના ભારતીય વિતરક મનોજ નંદવાનાએ સનસનીખેજ ખુલાસો કરતા જણાવ્યું છે કે, સેન્સર બોર્ડના એક સભ્યએ તેમને સ્પષ્ટ શબ્દોમાં કહ્યું હતું કે, "જો આ ફિલ્મ રિલીઝ થશે, તો તે ભારત-ઇઝરાયલ સંબંધોને તોડી નાખશે." નંદવાનાએ આ નિર્ણયને આશ્ચર્યજનક ગણાવતા ઉમેર્યું કે, આ ફિલ્મ અમેરિકા, યુકે, ફ્રાન્સ અને ઇટાલી જેવા દેશોમાં પણ રિલીઝ થઈ છે, જેમના ઇઝરાયલ સાથે મજબૂત સંબંધો છે. પરંતુ ભારતીય સેન્સર બોર્ડ કોઈપણ ભોગે આ ફિલ્મને રોકવા માંગે છે.

હિંદ રજબની તે હૃદયદ્રાવક કહાની

આ ફિલ્મ ગાઝામાં બનેલી એક સત્ય ઘટના પર આધારિત દસ્તાવેજી નાટક (Docu-drama) છે. તે ૬ વર્ષની પેલેસ્ટિનિયન બાળકી હિંદ રજબની વાર્તા દર્શાવે છે, જે જાન્યુઆરી ૨૦૨૪માં યુદ્ધગ્રસ્ત ગાઝામાં ઇઝરાયલી સુરક્ષા દળોના ગોળીબાર વચ્ચે એક કારમાં ફસાઈ ગઈ હતી. રેડ ક્રેસન્ટના પેરામેડિક્સ તેને બચાવવા પહોંચ્યા તે પહેલા જ હિંદ અને તેના પરિવારના છ સભ્યોની હત્યા કરવામાં આવી હોવાનો આરોપ છે. આ ઘટનાએ સમગ્ર વિશ્વમાં માનવાધિકારના ઉલ્લંઘન અંગે ભારે હોબાળો મચાવ્યો હતો.

આંતરરાષ્ટ્રીય સ્તરે સન્માનિત છતાં ભારતમાં પ્રતિબંધ

કૌથર બેન હાનિયા દ્વારા નિર્દેશિત આ ફિલ્મે વેનિસ ઇન્ટરનેશનલ ફિલ્મ ફેસ્ટિવલમાં ગ્રાન્ડ જ્યુરી પ્રાઇઝ સહિત સાત એવોર્ડ્સ જીત્યા છે. તેને ગોલ્ડન ગ્લોબ અને ઓસ્કારમાં પણ નોમિનેશન મળ્યું હતું. ભારતમાં આ ફિલ્મ માર્ચ મહિનામાં રિલીઝ થવાની હતી, પરંતુ હવે સેન્સર બોર્ડના અડિંગાને કારણે તે કદાચ ક્યારેય ભારતીય પડદા પર જોવા મળશે નહીં. વિતરકો હવે આ નિર્ણય વિરુદ્ધ અપીલ કરવાની તૈયારી કરી રહ્યા છે.