મુંબઇ તા.૨૧: વર્ષ ૨૦૨૫ ના મહાકુંભ મેળા દરમિયાન રુદ્રાક્ષની માળા વેચતી વખતે પોતાની માસૂમિયતથી રાતોરાત સોશિયલ મીડિયા સનસનાટી  બનેલી મોનાલિસા ભોંસલે અત્યારે ગંભીર સંકટમાં મુકાઈ છે. પોતાના આંતરધાર્મિક લગ્નને કારણે ભારે ટીકાઓનો સામનો કરી રહેલી મોનાલિસા અને તેના પતિ ફરમાન ખાને હવે જાહેર વહીવટીતંત્ર પાસે સુરક્ષાની ગુહાર લગાવી છે. આ દંપતીએ એક વિચલિત કરનારો વિડિયો શેર કરીને પોતાનો જીવ જોખમમાં હોવાની આશંકા વ્યકત કરી છે.

મોનાલિસા ભોંસલેએ તેના અધિકૃત ફેસબુક પેજ પર એક વિડિયો જાહેર કર્યો છે, જેમાં તે તેના પતિ ફરમાન ખાન સાથે જોવા મળે છે. આ વિડિયોમાં તેમણે મુખ્યમંત્રી , પોલીસ કમિશનર અને મીડિયા ને તાત્કાલિક દરમિયાનગીરી  કરવા અપીલ કરી છે. મોનાલિસાએ અત્યંત ગંભીર આરોપ લગાવતા જણાવ્યું છે કે તેમને જાહેરમાં જાનથી મારી નાખવાની અને અંગછેદન કરવાની સતત ધમકીઓ મળી રહી છે. આ અંગે તેમણે સત્તાવાર રીતે પત્રો અને ઈમેઈલ  દ્વારા અધિકારીઓને જાણ કરી સુરક્ષા પૂરી પાડવા વિનંતી કરી છે.

આ વિવાદ વકરે તે પહેલાં, ૧૧ માર્ચ, ૨૦૨૬ ના રોજ કેરળના અરુમાનૂર શ્રી નૈનાર દેવ મંદિરમાં આ દંપતીના લગ્ન ખૂબ જ ધામધૂમથી સંપન્ન થયા હતા. આ લગ્ન સમારોહમાં અપેક્ષા કરતા વધુ ભીડ ઉમટી પડી હતી અને કેરળ સરકારના શિક્ષણ મંત્રી સહિત અનેક મહાનુભાવોએ હાજર રહીને નવદંપતીને આશીર્વાદ આપ્યા હતા. મોનાલિસા અને ફરમાને કેરળ વહીવટીતંત્ર ના સહયોગ બદલ આભાર માન્યો હતો અને જણાવ્યું હતું કે ત્યાં તમામ ધર્મોને સમાન સન્માન આપવામાં આવે છે.

મોનાલિસા અને ફરમાન ખાનની મુલાકાત એક ફિલ્મ પ્રોજેકટ દરમિયાન થઈ હોવાનું મનાય છે. વ્યવસાયિક કામ થી શરૃ થયેલી તેમની મિત્રતા ધીરે ધીરે પ્રેમમાં પરિણમી અને અંતે તેમણે લગ્ન કરવાનો નિર્ણય લીધો હતો. જોકે, આ લગ્ન બાદ સોશિયલ મીડિયા પર એક મોટો વર્ગ તેમની ટીકા કરી રહ્યો છે, જે હવે જીવલેણ ધમકીઓ સુધી પહોંચી ગઈ છે. હાલમાં આ દંપતી ભયના ઓથાર હેઠળ જીવી રહ્યું છે અને કાયદાકીય રક્ષણની આશા રાખી રહ્યું છે