તા. ૯ જાન્યુઆરી ર૦ર૫ વિક્રમ સંવત ર૦૮૧ પોષ સુદ – ૧૦ ગુરૂવાર
ઈરાન સામે કોઈ સીઝફાયર નહીં: ટ્રમ્પની ગર્જના
હોર્મુઝ સ્ટ્રેટ મુદ્દે ચીન-જાપાનને ફેંકયો મોટો પડકાર : લશ્કરી અભિયાન ચાલુ રાખવાની કરી જાહેરાતઃ વૈશ્વિક તેલ બજારમાં હાહાકારઃ હોર્મુઝ ખોલવાની જવાબદારી એશિયન દેશોના માથે નાખી
વોશિંગ્ટન, તા.૨૧: અમેરિકી રાષ્ટ્રપતિ ડોનાલ્ડ ટ્રમ્પે ઈરાન સાથેના ૨૨ દિવસના લોહીયાળ જંગ વચ્ચે યુદ્ધવિરામની તમામ શકયતાઓને ફગાવી દઈને વિશ્વને ચોંકાવી દીધું છે. વ્હાઇટ હાઉસની બહાર પત્રકારો સાથે વાત કરતા ટ્રમ્પે સ્પષ્ટ શબ્દોમાં કહ્યું કે, જ્યારે તમે વિરોધી પક્ષનો સંપૂર્ણ નાશ કરી રહ્યા હોવ, ત્યારે યુદ્ધવિરામનો કોઈ અર્થ રહેતો નથી. તેમણે ઈઝરાયલ અને અમેરિકાના એક જ લક્ષ્ય - સંપૂર્ણ વિજય હોવાનો પુનરોચ્ચાર કર્યો છે. આ નિવેદનથી સ્પષ્ટ થાય છે કે મધ્યપૂર્વમાં મિસાઈલોનો વરસાદ હજુ અટકવાનો નથી અને અમેરિકા ઈરાનને સૈન્ય રીતે તોડી પાડવા કટિબદ્ધ છે.
સૌથી વધુ ચર્ચા ટ્રમ્પના હોર્મુઝ સામુદ્રધુની અંગેના નિવેદનની થઈ રહી છે, જે વિશ્વના ૨૦ ટકા તેલ પુરવઠાનો જીવાદોરી સમાન માર્ગ છે. ટ્રમ્પે વ્યૂહાત્મક રીતે કહ્યું કે આ માર્ગ યોગ્ય સમયે પોતાની મેળે જ ખુલશે, પરંતુ તેની સુરક્ષા માત્ર અમેરિકાની જવાબદારી નથી. તેમણે ખાસ કરીને ચીન અને જાપાનનો ઉલ્લેખ કરતા જણાવ્યું કે, આ એશિયન દેશો આ માર્ગ પરથી સૌથી વધુ તેલ આયાત કરે છે, તેથી તેમણે તેને સુરક્ષિત રાખવા માટે આગળ આવવું જોઈએ. ટ્રમ્પના મતે જો ચીન આ પ્રક્રિયામાં જોડાય તો તે વિશ્વ માટે ફાયદાકારક રહેશે, જે એક રીતે બેઇજિંગને આ સંઘર્ષમાં ખેંચવાનો સંકેત છે.
આ આર્થિક યુદ્ધ વચ્ચે ટ્રમ્પે એક વિચિત્ર છૂટછાટ પણ આપી છે, જેમાં ઈરાનને ટેન્કરોમાં ફસાયેલું ૧૪૦ મિલિયન બેરલ તેલ વેચવાની અસ્થાયી પરવાનગી અપાઈ છે. આ નિર્ણય પાછળનો હેતુ તેલના ભાવને ઼૧૦૦ ની નીચે લાવવાનો છે, જેથી વૈશ્વિક ફુગાવો કાબૂમાં રહે. જોકે, બીજી તરફ બગદાદમાં અમેરિકી ઠેકાણાઓ પર ઈરાની હુમલા તેજ થયા છે, જેના કારણે ટ્રમ્પ વહીવટીતંત્રે પોતાના નાગરિકોને તાત્કાલિક ઈરાક છોડવા સૂચના આપી છે. હવે જોવાનું એ રહેશે કે ટ્રમ્પની આ માસ્ટરસ્ટ્રોક નીતિ ચીન અને જાપાનને આ યુદ્ધના મેદાનમાં કઈ રીતે ઉતારે છે.
(2:53 PM IST)
છેલ્લા 8 દિવસમાં સૌથી લોકપ્રિય 
