મુંબઈ:  વેકેશન કે બિઝનેસ ટ્રિપ માટે ફ્લાઇટની ટિકિટ બુક કરાવ્યા પછી આપણે સામાન પેક કરવામાં એટલા મશગૂલ થઈ જઈએ છીએ કે ઘણીવાર સુરક્ષા નિયમોને વિસરી જઈએ છીએ. બ્યુરો ઓફ સિવિલ એવિએશન (BCAS) ના કડક માર્ગદર્શિકા મુજબ, વિમાનમાં એવી કોઈપણ વસ્તુ લઈ જવી ગુનો છે જે આગ લગાડી શકે અથવા વિસ્ફોટક સાબિત થઈ શકે. સામાન્ય લાગતી દિવાસળીની પેટી કે સ્ટાઇલિશ લાઈટર પણ એરપોર્ટ પર તમારા માટે મોટી મુસીબત ઉભી કરી શકે છે. હકીકતમાં, ઊંચાઈ પર હવાના દબાણમાં થતા ફેરફારને કારણે આ વસ્તુઓ અત્યંત સંવેદનશીલ બની જાય છે અને નાનકડી ભૂલ આખા વિમાનને જોખમમાં મૂકી શકે છે.

એરપોર્ટ સુરક્ષા તપાસ  દરમિયાન જો તમારા હેન્ડ બેગેજ અથવા ચેક-ઇન સામાનમાંથી લાઈટર પ્રવાહી, પેઈન્ટ થિનર, ટર્પેન્ટાઈન તેલ અથવા ગેસ લાઈટર મળી આવે, તો તેને તાત્કાલિક જપ્ત કરી લેવામાં આવે છે. એટલું જ નહીં, જો આ વસ્તુઓ છુપાવીને લઈ જવાનો પ્રયાસ કરવામાં આવ્યો હોય, તો સુરક્ષા અધિકારીઓ મુસાફરની કલાકો સુધી પૂછપરછ કરી શકે છે અને ગંભીર કિસ્સાઓમાં અટકાયત પણ થઈ શકે છે. ખાસ કરીને ઈલેક્ટ્રિક લાઈટર અને હાઈ-પ્રેશર ધરાવતા ઔદ્યોગિક સ્પ્રે પર સખત પ્રતિબંધ છે, કારણ કે તે વિસ્ફોટક શ્રેણીમાં આવે છે.

ઘણા મુસાફરોને એવું લાગે છે કે નાનું પરફ્યુમ કે બોડી સ્પ્રે લઈ જવામાં કોઈ વાંધો નથી, પરંતુ અહીં પણ મર્યાદા નક્કી કરવામાં આવી છે. વ્યક્તિગત વપરાશ માટેના નાના એરોસોલ સ્પ્રેની મંજૂરી છે, પરંતુ વધુ પડતા જ્વલનશીલ કેમિકલ્સ ધરાવતા સ્પ્રે જોખમી માનવામાં આવે છે. તમારી મુસાફરી સુખદ રહે અને એરપોર્ટ પર કોઈ કાયદાકીય ગુંચવણમાં ન ફસાવું પડે તે માટે પેકિંગ કરતા પહેલા પ્રતિબંધિત વસ્તુઓની યાદી તપાસવી અનિવાર્ય છે. યાદ રાખો, એરપોર્ટ પરની 'સ્કેનિંગ મશીન' તમારી બેગના ખૂણેખૂણે છુપાયેલી નાની દિવાસળીને પણ પકડી પાડવા સક્ષમ છે.